Keshe burynǵy ulttyq ekonomika ministri Qýandyq Bishimbaevqa qatysty sot otyrysy ótti. Sot protsesi barysynda jábirlenýshi taraptyń ókili - marqum Saltanat Núkenovanyń aǵasy Aitbek Amangeldi jáne kýágerler sóz sóiledi.
Núkenovterdiń advokat Janna Orazbaqova áleýmettik jelide keshegi sot otyrysy qalai ótkenin jazdy, - dep habarlaidy Dalanews.kz.
Onyń sózinshe, keibir tusta jábirlenýshi taraptyń suraqtary negizsiz alyp tastalǵan.
"Óte uzaq kún boldy… Saltanat Núkenovanyń ólimine qatysty is boiynsha sot kúni boiyna, az ǵana ýaqyt túski úzilispen saǵat 10.00-den 18.30-ǵa deiin sozyldy.
Sot iske tikelei qatysy bar suraqtarymyzdy negizsiz alyp tastady. Biraq bizdiń klientimizden (Aitbek Amangeldiden - esk.) jaýap alý kezinde biz alyp tastaýdy suraǵan orynsyz suraqtar alyp tastalmady.
Biz búkil protsess boiy jaýap alynǵan adamdardyń arqasyn kórip otyrdyq. Olarǵa durystap qarap, suraqtar qoiýǵa múmkindigimiz bolmady. Alqabiler de olardyń emotsiiasyn kóre almady, óitkeni olar alqabilerge de teris qarap turdy.
Protsestiń basynda biz durystap jaýap alý jáne jumys isteý úshin tribýnany jyljytýdy suradyq, biraq aiaqtalǵansha solai otyrdyq", - deidi ol.
Aita keteiik, keshegi sot otyrysynda qylmys bolǵan jerde jumys istegen qyzmetker kýáger retinde jaýap berdi.
"Saǵat 19.00 shamasynda Baijanov telefonyma habarlasyp, BAU meiramhanasyna kóterilýimdi surady. Ne úshin ekenin bilmeimin. "Tez kóteril" dedi. Men birden sol jaqqa bardym. Liftke kirsem, jedel járdem boldy. Qýandyq Ýálihanuly qolyna pyshaq ustap júrdi. Ol dárethana jaqqa pyshaqpen kirip ketti. Biz qatty qorqyp kettik, artynan erdik. Odan pyshaqty alyp, politsiia kelgenshe kúttik. 15-20 minýtta politsiia keldi", - dedi barmen.
Onyń sózinshe, Bishimbaevty kórgen kezde qasynda tek Baijanov bolǵan.
"Bishimbaev eshteńe aitpady. Sasqalaqtap turdy. Jylap turdy. "Ne úshin istedim, ne boldy?" dedi. Keiin ólim bolǵanyn bildik. Qarsylaspady (pyshaqty alǵanda - esk.). Mas edi. Ol "men óltirdim be?" dep surady. Ol óz-ózine qol jumsaǵysy kelgen shyǵar (pyshaqty ustaýdaǵy maqsaty - esk.). Ol dárethanaǵa jalǵyz kirip, jaýyp aldy. Biz sýitsid jasai ma dep qorqyp kirdik. Pyshaqty alyp alǵan kezde ashanaǵa basqa pyshaq alý úshin júgirip ketti. Qan, eshteńe bolmady", - dedi barmen.
27 naýryzda eks-ministr Qýandyq Bishimbaevtyń isi boiynsha alqabiler tańdalǵan edi. Alqabiler alqasyna 12 adam irikteldi: 10 – negizgi quram, 2 – qosalqy. Sodan keiin ashyq sot otyrystary bastaldy.
Keiin Qýandyq Bishimbaev sotta Saltanat Núkenovany asa qatygezdikpen óltirgenin moiyndamady.
Bul oqiǵa 2023 jyly 9 qarashada Astana qalasyndaǵy BAU meiramhanasynda boldy.
