Elimizdegi júzden astam etnostyń basyn biriktirip otyrǵan assambleia qashanda halyqtyń kókeiinde júrgen mańyzdy máselelerdi talqylap, olardyń oń sheshilýine súbeli úles qosyp kelgen.
Jiynda qoǵamda keń talqylanyp júrgen qazaq alfavitin kezeń-kezeńimen latyn grafikasyna kóshirýtýraly óz pikirimen bilim berý salasynyń qyzmetkeri Shymkent oqýshylar saraiynyń direktory Natalia Romanova bólisti.
Ol ulttyq jańǵyrýdyń naqty jobalarynyń biri − qazaq tiliniń kezeń-kezeńimen latyn álipbiine kóshý máselesi jýyrda ǵana kóterilgen dúnie emestigin atap ótti.
«Ómirdiń ózi bizge damýdyń dańǵyl jolyna ainalǵan latyn tańbalaryna ótýge múmkindik berip otyr. Tehnologiialyq progresstiń tili retinde latyn álipbiinen bastaý alatyn aǵylshyn tili aiqyndalǵan. Sondyqtan biz ǵylym men tehnikanyń qainar kózine balanǵan latyn grafikasyna kóshýge talpynýymyz qajet. Latyn tańbalary birinshiden, baiyrǵy qazaq sózderi men uǵymdaryn dál berýge septigin tigizse, ekinshiden, sheteldik azamattardyń qazaq tilin bilýge degen qulshynysyn arttyra túspek», − dedi Natalia Romanova.
Ótken jyly «Jumyspen qamtý-2020» baǵdarlamasy aiasynda Soltústik Qazaqstan oblysyna qonys aýdarǵanyn aitqan «Jańa El» JShS direktorynyń orynbasary Baýyrjan Úsenov soltústikte qolynda diplomy bar kez kelgen mamanǵa jumysqa ornalasýǵa múmkindik jetkilikti ekenin aitty.
«Ońtústikten jinalǵan 25 otbasy birlese kóship, Shoqan Ýálihanov aýdanynyń Qondybai aýylyna jaiǵastyq. Úkimet tarapynan belgilengen járdemaqyǵa qol jetkizdik. Eń bastysy, barlyǵymyz baspanamen qamtyldyq. Barlyǵymyz bir seriktestikke birigip, 7 myń gektar jerdi igerýdemiz. Bul úshin bizge laiyqty qoldaý jasaǵan Memleket basshysyna aitar alǵysymyz sheksiz», − dedi Baýyrjan Úsenov.
Búginde eńbekke qabiletti azamattardyń barlyǵy jumyspen qamtylǵanyn aitqan ol, byltyr barǵandarmen birlese 2 naýbaihana men toihana, dúken ashqanyn jáne mal bordaqylaý alańdaryn soǵýdy qolǵa alǵanyn jetkizdi.
Álemniń 32 elinen kelip bilim alyp jatqan Qazaqstandaǵy bedeldi de sapaly bilim beretin oqý ornynda oqyp jatqanyn qýananyshpen jetkizgen 2 kýrs stýdenti Iasir Rashid Aýǵanstan jastaryna osyndai kómek bergen Qazaqstanǵa, onyń halqyna úlken alǵysyn jetkizdi.
«Taǵy bir maqtanatynym, qazaq tilin 2 aidyń ishinde tolyqtai meńgerip aldym. Kez kelgen qazaqpen qazaqsha sóilese alatyn dárejege jettim. Qazaq tilin bilýdiń paidasyn kórmesem, ziiany tiip jatqan joq. Bul osy memlekette júrgizilip otyrǵan saiasattyń arqasy. Meniń ómiriniń jastyq shaǵy ot pen oqtyń arasynda ótti. Men siiaqty myńdaǵan aýǵanstandyq jastar, Qazaqstandaǵy beibit zamanǵa qyzyǵa qaraidy. Barlyq kezde de beibitshilik pen birliktiń, tatýlyqtyń qadirin bileiik», − dedi stýdent.
OQO ákiminiń baspasóz qyzmeti
