Jumys saparynyń birinshi kúni óńir basshysy Atameken aýyldyq okrýginiń turǵyndarymen kezdesti. Jiyn barysynda aýyl ákimi Nurhan Mustafaev jyl boiy atqarylǵan jumystardy baiandady.
Budan keiin oblys ákimi Nurlan Noǵaev turǵyndardy óńirde atqarylyp jatqan jumystardan habardar etip, olardyń saýaldaryna jaýap berdi. Jergilikti halyq arnaiy qoqys tógetin jáshikterdiń joqtyǵy, qańǵybas itterdiń kóbeiýi, aýyl kóshelerin jaryqtandyrý, aýyz sý tapshylyǵyn joiý, jer telimderin alý, jaiaý júrginshiler jolyn salý máselelerin kóterdi. Aimaq basshysy kóterilgen barlyq saýaldar men usynystar mańyzdylyǵyna qarai sheshiletinin atap ótti.
– Memleket basshysy Qasym-Jomart Toqaev Mańǵystaý oblysyna kelgen jumys saparynda óńirdiń eń ózekti aýyz sý máselesin sheshýdi tapsyrdy. Osy baǵytta biz birqatar iri jobalardy qolǵa alyp jatyrmyz. Munaily aýdany – Qazaqstandaǵy halyq sany boiynsha eń jyldam ósip kele jatqan aýdannyń biri. Sondyqtan aýyz sýmen qamtamasyz etý máselesi ýákiletti organdardyń turaqty baqylaýynda bolýy kerek. Jergilikti atqarýshy organ balabaqsha, mektep, aýrýhana syndy áleýmettik nysandardyń qurylysyn uiymdastyrýy qajet. El Prezidenti óz joldaýynda halyqtyń ómir súrý sapasyn jaqsartý jóninde tapsyrmalar berdi. Sondyqtan biz osy baǵytta jumys atqaramyz. Búgin kóterilgen máselelerdiń barlyǵy sheshimin tabady. Oǵan shydamdylyq pen ýaqyt kerek, – dedi Nurlan Noǵaev.
Aita keteiik, Atameken – Munaily aýdanyndaǵy halyq eń kóp shoǵyrlanǵan aýyl. Onda 43 myńnan astam turǵyn bar. Qazirgi tańda bul aýyldaǵy eń ózekti másele – jazǵy ýaqytta aýyz sýdyń jetispeýshiligi.
Jalpy, Atameken aýylyn tolyqtai sýmen qamtý úshin kúnine 5600 tekshe metr sý qajet. Alaida, búgingi tańda qys mezgilinde táýligine 1500-2000 tekshe metr, jaz ailarynda 2000-2500 tekshe metr sý beriledi.
Máseleni sheshý úshin syiymdylyǵy 2000 tekshe metrdi quraityn qosymsha sý aidaý qondyrǵysyn ornatý josparlanýda. Ol úshin jergilikti biýdjetke usynys berildi. Bul qondyrǵy Jalyn, Arai, Shaǵala eldi mekenderin aýyz sýmen tolyq qamtamasyz etetin bolady.
Odan ári aimaq basshysy Nurlan Noǵaev «Iasin» meditsinalyq ortalyǵynyń qurylys jumystarymen tanysty. Búgingi tańda emdeý mekemesiniń qurylysy 99 paiyzǵa aiaqtalǵan. Zamanaýi meditsinalyq qural-jabdyqtarmen jabdyqtalǵan ortalyq kúnine orta eseppen 450-500 adamǵa meditsinalyq kómek kórsetýge qaýqarly.
Ortalyqta tájiribeli pediatr, nevropatolog, lor, okýlist, hirýrg, ýzi dárigerleri qyzmet atqaratyn bolady. Nysan tolyq iske qosylǵanda 200-ge jýyq adam turaqty jumyspen qamtylady dep kútilýde. Búginde ortalyqqa 7 myńǵa jýyq turǵyn tirkelgen. Aldaǵy ýaqytta onyń sanyn 30 myńǵa jetkizý josparlanýda. Nysan sáýir aiynyń sońynda iske qosylmaq.
Budan keiin Nurlan Noǵaev Basqudyq aýyldyq okrýgindegi sý aidaý stansasy men joǵary qysymdy gaz qubyrlary jelisiniń jumysymen tanysty.
Gaz qubyry Basqudyq aýylynyń Bolashaq turǵyn úi massivindegi 10 kósheniń ortasynda qalyp qoiǵan. Sonyń saldarynan jedel járdem, órt sóndirý kólikteriniń atalǵan kóshelermen qatynaýy qiyndaǵan. Osyǵan orai aimaq basshysy jaýapty tulǵalarǵa bul máseleni der kezinde sheship, turǵyndardyń qaýipsizdigin qamtamasyz etý úshin qajetti sharalardy qabyldaýdy tapsyrdy.
Sonymen qatar aimaq basshysy balalarǵa arnalǵan jáne arnaiy jumys kiimderin tigip, daiyndaityn «Janarys» tigin tsehynyń jumysymen tanysty.
Sondai-aq oblys ákimi Munaily aýdandyq IIB jeke quramymen kezdesip, qyzmetkerlerge qaýipsizdik pen quqyqtyq tártipti qamtamasyz etýdegi eńbekteri úshin alǵys aitty.
