Birinshi kezekte aımaq basshysy 120 adamǵa arnalǵan angarlyq tıptegi sport keshenine bardy. Sport kesheninde voleıbol, basketbol jáne shaǵyn fýtbol alańdary jáne jattyǵý jasaýǵa arnalǵan zaldar bar, sondaı-aq jekpe-jekpen aınalysýǵa barlyq jaǵdaı jasalǵan.
Aıta ketý kerek, Mańǵystaý oblysyn damytýdyń keshendi jospary aıasynda Jańaózen qalasynda osyndaı 8 sport zaly jáne 10 sport alańyn salý josparlanýda.
2023 jyly "Aýyl el besigi" baǵdarlamasy aıasynda Teńge jáne Qyzylsaı aýyldarynda 2 jobanyń qurylysy qolǵa alynady.
Sondaı-aq, aımaq basshysy qaladaǵy jaıaý júrginshilerge arnap salynyp jatqan aleıaǵa bardy. Onda shaǵyn sáýlet nysandary, eko stılindegi balalar oıyn alańdary, qolónershilerge arnalǵan kıiz úıler, art-nysandar, fotozonalar, workout alańdary, sýburqaqtar, kóleńkeli qalqalar, sahna, mýraldar jáne saýda pavılondary ornalasady.
Nurlan Noǵaev odan ári qazirgi tańda kúrdeli jóndeýden ótip jatqan "Oqýshylar saraıynda" boldy. Jóndeý jumystary aıaqtalǵannan keıin ǵımaratta jastar ortalyǵy ashylady. Onda robototehnıka, sándik dızaın, dybys jazý, teatr, fotostýdıa, kovorkıng, sporttyq jáne t. b. úıirmeler jumys isteıtin bolady.
Jumys saparynyń sońynda oblys basshysy "Alǵa" sport klýbynyń múmkindigi shekteýli sportshylarymen kezdesti.
Múmkindigi shekteýli jandarǵa arnalǵan "Alǵa" sport klýby 1990 jyly qurylǵan. Atalǵan klýbtyń sportshylary 11 márte Qazaqstan chempıony atanyp, London, Fınlándıa, Polsha, Antalıa, Kambodjada ótken kóptegen halyqaralyq jarystarda júldeli oryndarǵa ıe bolyp júr.
Jańaózen qalasynyń paralımpıadashylary Qazaqstan ulttyq quramasynyń músheleri jáne Malaızıada ótken paralımpıada oıyndarynda 3 qola medal jeńip aldy. Klýb sportshylary otyryp oınaý volleıboly, jaǵajaı volleıboly, ústel tenısi, arbamen bıleý jáne aýyr atletıka sıaqty sport túrlerinde óner kórsetedi.
Qazirgi ýaqytta sportshylar №1 JOM bazasynda jattyǵady. Sport zaldarynyń biriniń qurylysy aıaqtalǵannan keıin Mańǵystaý oblysyn damytýdyń keshendi jospary aıasynda múmkindigi shekteýli sportshylar yńǵaıly jaǵdaıda jattyǵa alady.
Óńir basshysy óz kezeginde sportshylarǵa oblystyń paralımpıadalyq sport túrlerin damytýǵa qosqan úlesi úshin alǵysyn bildirdi.
– Óz jeńisterińiz arqyly sizder erlik pen múmkindikterdiń sheksiz ekenin dáleldedińizder. Sizderdiń jetistikterińiz – bul qajyrly eńbek pen berik rýhtyń nátıjesi. Ómirde jetistikke jetý jolynda adamnyń qolynan kelmeıtin nárse joq ekenin kóp jastarǵa dáleldep, úlgi bolarlyqtaı nátıje kórsetip júrsizder, – dep atap ótti Nurlan Noǵaev.
Jıyn sońynda oblys ákimi paralımpıadalyq sport túrlerin damytýǵa qosqan úlesi úshin sportshylardy alǵys hattarmen marapattady.
