Aimaq basshysy aldymen «Munaly psihologiialyq-pedagogikalyq túzetý kabinetiniń» jumysymen tanysty. Búgingi tańda ortalyqta ártúrli diagnozy bar 200-den astam erekshe balaǵa tegin kómek kórsetilýde. Ortalyqta 3 logoped, 2 defektolog, 1 psiholog, 1 massaj jáne LFK mamany jumys isteidi.
Nurlan Noǵaev Munaily aýdan ákimi men ýákiletti tulǵalarǵa memlekettik-áleýmettik tapsyrys aiasynda erekshe balalarǵa arnalǵan yńǵaily ári jaily ortalyq ashý máselesin pysyqtaýdy tapsyryp, mundai jumystar oblys kóleminde de júrgizilý kerektigin atap ótti.
Odan ári oblys basshysy aýdandaǵy ortalyq Mádeniet úiinde halyqpen kezdesý ótkizdi. Jiyn barysynda Munaily aýdanynyń ákimi Erjan Kúmisqaliev ótken jyly atqarylǵan jumystardy baiandap, 2022 jylǵa arnalǵan josparlarymen bólisti.
Budan keiin oblys ákimi Nurlan Noǵaev turǵyndardy óńirde atqarylyp jatqan jumystar týraly habardar etip, saýaldaryna jaýap berdi.
Aimaq basshysy turǵyndardy jergilikti atqarýshy organdardyń jumysyna belsene aralasyp, qoldaý kórsetýge shaqyrdy.
– Jergilikti atqarýshy organdardyń jumysynda qoǵamdyq baqylaý men úkimettik emes uiymdardyń kómegi qajet ekenin Qazaqstan Prezidenti Qasym-Jomart Toqaev birneshe ret aitqan bolatyn. Biz úkimettik emes uiymdardyń bastamalaryna memlekettik-áleýmettik tapsyrys jáne basqa da ádister arqyly qoldaý kórsetýge daiynbyz. ÚEU arqyly erekshe balalarǵa kómek kórsetýge, emdeýge, olardy ońaltý jáne oqytý máselelerin sheshýge bolady. Mundai bastamalardy júzege asyrýǵa memleket óz kezeginde kómek kórsetýge daiyn, – dedi Nurlan Noǵaev.
Munaily aýdanynda búginde 180 myńǵa jýyq adam turady. Aýdandaǵy negizgi máselelerdiń biri – úsh aýysymdy oqytýdy joiý. Sebebi aýdanda týý kórsetkishi óte joǵary (jylyna 5 myńnan astam bala ómirge keledi). Sáikesinshe, jyl saiyn mektep oqýshylarynyń sany artyp keledi.
Búgingi tańda Basqudyq aýyldyq okrýginen 800-den astam bala kórshiles Mańǵystaý aýylyna qatynap oqidy. Bul máseleni sheshý úshin Basqudyqta 600 jáne 1200 oryndyq mektep qurylysy júrgizilýde. Biyl 600 oryndyq mektepti paidalanýǵa berý josparlanýda. Atalǵan mektepterdiń qurylysy aiaqtalǵan soń, másele túbegeili sheshimin tabatyn bolady.
2021 jyly Basqudyq aýyldyq okrýginde 110 oryndyq jekemenshik «IQ» bastaýysh mektebi, sondai-aq Munaily aýylynda 80 oryndyq «Merei» jekemenshik bastaýysh mektebi ashyldy.
Aldaǵy ýaqytta Mańǵystaý aýylynyń Besshoqy turǵyn úi massivinen 1200 oryndyq mektep qurylysynyń jobalyq-smetalyq qujattamasyn memlekettik saraptamaǵa tapsyrý, sondai-aq 1500 oryndyq úsh jekemenshik mektep salý josparlanýda. Sonymen qatar Qyzyltóbe-2 aýylyndaǵy 1200 oryndyq mektep qurylysynyń jobalyq-smetalyq qujattary daiyn.
Aǵymdaǵy jyldyń naýryz aiynda Mańǵystaý aýylynda 150 orynǵa arnalǵan aýdandyq ortalyq aýrýhana ǵimaratynyń qurylysy bastaldy. Sonymen qatar, Qyzyltóbe, Qyzyltóbe-2, Dáýlet jáne Baiandy aýyldaryndaǵy dárigerlik ambýlatoriialarynyń ǵimarattaryna kúrdeli jóndeý jasaý úshin jobalyq-smetalyq qujattama ázirleýge qarjy bólindi.
Jumys saparynyń qorytyndysy boiynsha Nurlan Noǵaev Munaily aýdanynyń áleýmettik-ekonomikalyq damýyna qatysty jaýapty tulǵalarǵa birqatar naqty tapsyrmalar berdi.
