Kezdesýde aýyl ákimi Rasýl Ábishaev jyl boiy atqarylǵan jumystar týraly esep berip, 2022 jylǵa arnalǵan josparlarymen bólisti. Oblys ákimi Nurlan Noǵaev jinalǵan qaýymǵa oblysta atqarylyp jatqan jumystar týraly habardar etip, suraqtarǵa jaýap berdi jáne jergilikti turǵyndardyń usynystaryn tyńdady.
Oblys ákimimen kezdesýde turǵyndar áleýmettik sala, jumyspen qamtý, bank bólimshelerin ulǵaitý, qoǵamdyq kólik, aýyl sharýashylyǵy, aýyz sý, azyq-túlik baǵasy jáne joldaǵy qaýipsizdik máselelerin kóterdi.
Óńir basshysy kóterilgen máseleler basymdylyqtaryna qarai júieli túrde sheshiletinin atap ótti.
– Memleket basshysy Qasym-Jomart Toqaev óz Joldaýynda halyqtyń ómir súrý sapasyn arttyrý boiynsha naqty tapsyrmalar berdi. Tiisinshe, bizdiń aldymyzda barlyq máselelerdi birlesip jáne júieli túrde sheshý mindeti tur. Biz bul baǵytta eki basty qaǵidany qoldanatyn bolamyz. Bul memlekettik organdar qyzmetindegi ashyqtyq pen ádildik. Óńirdiń, Jańaózen men qala mańyndaǵy aýyldardyń búgingi tańdaǵy eń mańyzdy máselesi – aýyz sý. Biýdjet qarajaty birinshi kezekte osy máseleni sheshýge baǵyttalatyn bolady. Ekinshi kezekte, bizdiń balalarymyz úshin sapaly bilim berýdi qamtamasyz etý mindeti tur. Qalǵan máseleler basymdyqtarǵa bailanysty júieli túrde sheshiletin bolady, – dedi Nurlan Noǵaev.
Sondai-aq, oblys ákimi Qyzylsai aýylynda turatyn azamattardy jeke qabyldady.
Aita ketsek, Qyzylsai aýylynda 7500 adam turady. Eldi mekendi «Ózeninvest» kásiporny sýmen qamtamasyz etip otyr. Aýyl boiynsha 1047 turǵyn úi sý qubyryna qosylǵan. Ótken jyly 28 turǵyn úi sý qubyryna qosyldy. Sonymen qatar, Jańaózen qalasynyń keshendi damý jospary aiasynda 2020-2021 jyldary Qyzylsai aýylynyń sý qubyry tartylmaǵan keibir kóshelerine atap aitqanda, Ońtústik aýyl, M.Óskinbaev, M.Ótemisuly, Q.Sátbaev kóshelerine jáne Qalamqas qorymyna jalpy uzyndyǵy 1670 metr sý qubyry tartyldy.
Jumys saparynyń birinshi kúniniń qorytyndysy boiynsha óńir basshysy jaýapty tulǵalarǵa birqatar naqty tapsyrmalar berdi.
