Memleket basshysy alańǵa jınalǵan kópshilikti Túrkistan oblysynyń qurylýymen quttyqtady.
«Túrkistan – bizdiń halqymyz úshin úlken mańyzǵa ıe. Orta Azıadaǵy kóne de qasıetti qalalardyń biregeıi. 2000 jyly biz Túrkistannyń 1500 jyldyǵyn atap óttik. Munda qazaq halqynyń uly tulǵalary men qaıratkerleri jerlengen. Tarıhymyzdyń qıly kezeńderinde bul jerde ultymyzdyń bolashaǵyna qatysty mańyzdy sheshimder qabyldanǵan. Jalpy, Túrkistannyń tarıhy – kúlli qazaq halqynyń tarıhy», - dedi Qazaqstan Prezıdenti.
Sondaı-aq, Prezıdent Túrkistannyń túrki halyqtary úshin de asa mańyzdy qala ekendigine toqtalyp, qabyldanǵan Jarlyqqa sáıkes qala jańa bıikterdi baǵyndyratynyna senim bildirdi. Nursultan Nazarbaev Túrkistandy ilgeriletý isinde barsha turǵyndarǵa tabys tiledi.
Jıynda Túrkistan qalalyq ardargerler keńesiniń tóraǵasy Jarylqasyn Áziretbergenuly Elbasynyń bul Túrkistanǵa 15-sapary ekendigin aıtyp, el úshin atqaryp jatqan eren eńbekterine alǵys bildirdi.
Sonymen qatar, Túrkistan qalasynyń turǵyny, bilim salasynyń qyzmetkeri Zıaeva Móldir oblys ortalyǵy atanǵan Túrkistan qalasyna Memleket basshysynyń 29 qyrkúıektegi saparyna oraı qala kúnin osy dataǵa belgileýdi usyndy. Elbasy tosyn usynysqa óz razylyǵyn bildirdi.
Alqaly jıynda Túrkistan jurty QR Prezıdenti N.Á.Nazarbaevty zor yqylaspen shyǵaryp saldy.
Túrkistan oblysy ákiminiń baspasóz qyzmeti
