Biýro otyrysy Prezidenttiń 10 qańtarda Jalpyulttyq aza tutý kúni dep jariialanýyna orai, bir minýttyq únsizdikpen bastaldy.
Nurlan Nyǵmatýlin depýtattyq korpýs atynan elimizdiń birqatar óńirlerinde bolǵan qaiǵyly oqiǵalardyń saldarynan qaza tapqandardyń jaqyndary men týǵan-týystarynyń qaiǵysyna ortaqtasyp, kóńil aitty.
Májilis Tóraǵasy depýtattar birinshi kúnnen bastap oqiǵa oryndarynda, alańdarda halyqpen birge júrgenin, Úkimettik komissiiamen birge jumys istegenine toqtaldy. Sonymen qatar, barlyq depýtattar aimaqtarymen turaqty bailanysta bolǵanyn atap ótti.
– Búgin elimiz úshin, halqymyz úshin qiyn sátte Memleket basshysy Qasym-Jomart Kemeluly Toqaevtyń osy kúnderi qabyldaǵan árbir sheshimderi, árbir qadamdary el taǵdyryn qorǵaýǵa jáne saqtaýǵa baǵyttalǵan. Sondyqtan, birinshi kúnnen bastap Parlament Májilisi Prezidenttiń barlyq bastamalaryna jan-jaqty qoldaý kórsete otyryp, zań deńgeiinde naqty jumys isteýde, – dedi Palata Spikeri.
Otyrys barysynda depýtattar birqatar jańa zań jobalaryn jumysqa aldy. Atap aitqanda, jeke qosalqy sharýashylyq týraly, kinematografiia jáne mádeniet máseleleri boiynsha, turǵyn úi saiasatyn reformalaýǵa qatysty ózgerister men tolyqtyrýlar engizý týraly zań jobalary bar.
Sondai-aq, Palata komitetteri jumysqa alatyn qujattardyń qatarynda Qylmystyq jáne Qylmystyq-protsestik kodeksterine ekologiialyq quqyq buzýshylyqtar úshin jaýaptylyqty kúsheitý jáne Ákimshilik quqyq buzýshylyq týraly kodeksine ekologiialyq buzýshylyqtar úshin ákimshilik jaýaptylyqty kúsheitý máseleleri boiynsha túzetýler engizý týraly zań jobalary bar.
Sonymen qatar, Palata depýtattary birqatar ratifikatsiialyq zań jobalaryn jumysqa aldy. Olar: tolyq emes jumys ýaqyty jaǵdailaryndaǵy jumys týraly, Qazaqstan men Túrki Akademiiasyna bailanysty kelisim jáne BUU mediatsiia nátijesinde qol jetkizilgen halyqaralyq tatýlasý kelisimderi týraly konventsiialary.
