"Qazaqstandyqtar dollarǵa degen psihologiialyq táýeldilikten arylýǵa tiis". Ulttyq bank basshysy Timýr Súleimenov ózin qaýmalap, suraqtyń astyna alǵan jýrnalister qaýymyna osylai dep jaýap berdi, dep jazady Dalanews.kz.
"Men tańerteń tura salyp, dollar baǵamyna qaramaimyn. Birjadaǵy saýda-sattyq aldynda saǵat 10.00 shamasynda kóz salamyn. Óitkeni osy kezde meniń telefonyma qysqasha málimet keledi. Jumysym, kásibim bolǵan soń dollardyń baǵamyna qaraýym kerek. Al bylai, dollar dep basymdy aýyrtpaimyn. Bizde jalaqy teńgemen tólenedi, depozitter teńgemen saqtalady, baǵalar teńgede belgilenedi. Sóitip dollarǵa qaraý... kimge qyzyq, sol kórsin. Bul psihologiialyq táýeldilikten, meniń oiymsha, birte-birte arylý kerek", - dedi Súleimenov jýrnalisterge Ulttyq Banktiń dálizinde bergen pikirinde.
Onyń aitýynsha, qoǵam nazary dollarda bolǵanymen, evrony kóbine elei bermeidi.
Ulttyq Bank tóraǵasy bul rette halyqaralyq tólem ainalymyn qamtamasyz etetindikten dollar jaiy, sózsiz mańyzdy ekenin atap ótti.
"Biraq qazaqstandyqqa dollardyń ortasha baǵamy tikelei sonshalyqty qatty áser etpeitin bolar. Onyń importtalatyn taýarlar arqyly áser etýi múmkin, ol jaǵy túsinikti. Sondyqtan biz únemi: importqa táýeldilikti neǵurlym tez tómendetsek, ulttyq taýar óndirýshilerge neǵurlym basymdyq bersek, soǵurlym import qansha bolady dep qatty alańdamaimyz. Sondyqtan meniń erte tura salyp, dollar baǵamyn qaraityn ádetim joq: Men dollardy múldem satyp almaimyn. Tek shetelge baryp jatsam, sol kezde endi kerek bolýy múmkin. Al jalpy bizde barlyǵy teńgemen ǵoi", - dep atap ótti Súleimenov.
Sondai-aq Ulttyq Bank basshysy ulttyq valiýta memleket egemendiginiń nyshandarynyń biri bolyp tabylatynyn eske saldy.
