Almatyda aqsha aiyrbas oryndarynda 1 AQSh dollary 526 teńgeden satylýda. Al Ulttyq bank keshe valiýtalyq interventsiia jasaǵanyn moiyndady ári ony alda da júrgize bermek niette. Bul búgin osyndai málimdeme jasaǵan Ulttyq banktiń teńge baǵamynyń qalyptasýyna aralasyp, ony qoldaýdy jalǵastyratynyn bildiredi, dep habarlaidy Dalanews.kz.
Ulttyq bank baspasóz qyzmetiniń málimetinshe, birqatar irgeli faktorlardyń nasharlaýy aiasynda teńgeniń aiyrbas baǵamy AQSh dollary úshin 500 teńgeni eńserdi. Qazirgi ýaqytta birjadaǵy saýda-sattyq 1 AQSh dollary úshin 518-519 teńge aralyǵynda ótip jatyr. Keshegi kúnnen bastap 2,4%-ǵa álsiregendikten, 28 qarashadaǵy teńgeniń ortasha saralanǵan baǵamy AQSh dollary úshin 512,58 teńgeni quraidy.
Syrtqy jáne ishki faktorlar valiýta baǵamyna teris áser etti
"AQSh dollarynyń jahandyq nyǵaiýy, shikizat qunynyń ózgerýi jáne álemdegi geosaiasi jaǵdaidyń shielenisýi siiaqty birqatar syrtqy irgeli faktorlardyń ózgerýi aiasynda damýshy naryqtardaǵy valiýtalardyń teris dinamikasy barlyq jerde baiqalady. Negizgi álemdik valiýtalarǵa qatysty AQSh dollarynyń baǵamyn baqylaityn DXY indeksi ai basynan shamamen 2,2%-ǵa nyǵaiyp, 106,2 pýnktke deiin ósti (2024jyldyń 28 qarashasynda). EM valiýtalarynyń indeksi ai basynan 3,0%-ǵa tómendedi (2024 jylǵy 28 qarasha boiynsha). Dollardyń kúsh alýy – shikizat taýrlary úshin ádettegidei teris faktor. Munai baǵasynyń tym qubylýy, sol sekildi, Donald Tramptyń prezidenttik kezeńinde AQSh-tan munai jetkizilimderiniń artýy men múmkin bolatyn saýda bajdaryna qatysty usynystyń artýyna ákeledi degen ekonomisterdiń boljamdarynan pessimistik saryn baiqalady". delingen QR Ulttyq banktiń 29 qarashada valiýtalyq naryqtaǵy jaǵdaiǵa qatysty bergen túsiniktemesinde.
Sondai-aq retteýshi organ Resei Federatsiiasynyń qarjy sektoryna qarsy jańa sanktsiialar engizý aiasynda eldiń negizgi saýda seriktesteriniń biriniń valiýtasy – Resei rýbliniń álsireýine de basa toqtalady.
Resei rýbliniń baǵamy qatty quldyrap jatyr
"Osylaisha, birjada iýan/rýbl jubynyń baǵamy iýan úshin 15,1 rýblge jetip, qarasha aiynyń basynan bastap 11,2%-ǵa álsiredi. Forex Halyqaralyqvaliýta naryǵyndaǵy dollardyń aiyrbas baǵamy 1 dollar úshin 114,5 rýblden asty, al rýbl aidyń basynan bastap 18%-ǵa álsiredi", - deidi Ulttyq bank.
Ishki naryqta da dollarǵa suranys artqan
"Sonymen qatar, ishki valiýta naryǵynda ekonomikalyq agentter tarapynan shetel valiýtasyna suranystyń artýy jáne usynystyń shektelýi, onyń ishinde aiyrbas baǵamynyń psihologiialyq deńgeiin eńserý aiasynda baiqaldy. Máselen, osy jyldyń qarasha aiynda saýda-sattyqtyń ortasha táýliktik kólemi 238 mln AQSh dollaryn qurady, bul ótken jyldyń qarasha aiynan (193 mln AQSh dollary) 1,5 esege jýyq jáne tamyz-qyrkúiek ailaryndaǵy saýda-sattyqtyń ortasha táýliktik kóleminen edáýir joǵary".
"Osy atalǵan faktorlardyń jiyntyǵy teńge baǵamyna qysym jasaidy, jekelegen kezeńderde saýda-sattyq barysynda alyp-satarlyq qysymǵa jaǵdai jasai otyryp, valiýta naryǵyndaǵy teńgerimdi buzǵany jáne ótimdiliktiń tómendigi baiqalady. Turaqsyzdandyratyn aýytqýlardy boldyrmaý, teńgeniń aiyrbas baǵamynyń artyq qubylmalylyǵyn tegisteý úshin jáne shetel valiýtasyn usynýdy qamtamasyz etý maqsatynda Ulttyq Bank valiýtalyq interventsiialar júrgizedi", delingen búgingi valiýta naryǵyndaǵy jaǵdailarǵa qatysty Ulttyq bank bergen túsiniktemede.
Ulttyq bank valiýta naryǵyndaǵy ahýalǵa turaqty monitoring júrgizetinin aitady.
"Erkin baǵam qurý rejimi jaǵdaiynda Ulttyq bank aiyrbas baǵamynyń qandai da bir deńgeiine baǵyttalmaidy jáne onyń trendine kedergi keltirmeidi, onyń qalyptasýy irgeli faktorlarǵa sáikes odan ári júzege asyrylatyn bolady. Qarjylyq turaqtylyq táýekelderi jáne irgeli faktorlarǵa sáikes kelmeitin aiyrbas baǵamynyń shamadan tys qubylmalylyǵy týyndaǵan jaǵdaida, Ulttyq bank ádil baǵam túzilýin qalpyna keltirý jáne valiýta naryǵynyń qalypty jumys isteýin qamtamasyz etý úshin valiýtalyq interventsiialar júrgizýdi jalǵastyrýǵa daiyn", - deidi retteýshi organ.
Aita ketsek,ekonomikalyq sarapshy Ǵalymjan Aitqazin keshe teńge baǵamyn qoldaý úshin Ulttyq bank valiýtalyq interventsiia júrgizgen, bul qor naryǵyndaǵy is-qimyldardan baiqalady dep boljaǵan bolatyn. Mine, osy boljamdy búgin Ulttyq banktiń ózi rastap otyr.
