Energetika ministri Erlan Aqkenjenov Atyraýdaǵy NCOC qyzmetkeriniń ólimine qatysty tergeý júrip jatqanyn málimdep, marqumnyń otbasyna kóńil aitty, – dep habarlaidy Dalanews.kz.
Ministrdiń pikiri
"Árine, óreskel jaǵdai ekenin moiyndaý kerek. Osy múmkindikti paidalanyp, ministr retinde marqumnyń otbasy men jaqyndaryna kóńil aitqym keledi. Men ony tanymaitynmyn. Qazir tergeý júrgizilip jatqanyn bilemin. Bul qylmysqa kináli adamdar tabylatynyna jáne laiyqty túrde jazalanatynyna senimdimin", - dedi ol.
Sheneýnik "bul jaǵdai marqumnyń jumysyna bailanysty bolýy múmkin be?" degen saýalǵa jaýap berdi.
"Pikir bildire almaimyn. Tergeý anyqtap, tiisti qorytyndy shyǵarady dep oilaimyn. Bul jumysqa bailanysty boldy ma? Álde turmystyq zorlyq-zombylyq boldy ma? Jaýap bere almaimyn, tergeý júrip jatyr", - dedi ministr.
Qaiǵyly oqiǵa
Eske salaiyq, 29 sáýirde Atyraýda óz úiinen 45 jastaǵy Bibigúl Shpanova óli tabylǵan bolatyn. Onyń munai-gaz salasynda 20 jyldan asa tájiribesi bar, NCOC kompaniiasynyń bólim basshysy da bolǵan. Politsiia málimetteri boiynsha áieldiń denesinde pyshaq jaraqattary anyqtalǵan, al páterindegi seif ashylǵan.
Marqumnyń týystary Adam quqyqtary biýrosyna júginip, jan-jaqty tergeý júrgizýdi talap etti. Olar qylmystyń sebebi marqumnyń kásibi qyzmetine bailanysty bolýy múmkin dep esepteidi.
Politsiia ne deidi?
Politsiia kúdiktini, iaǵni 1987 jyly týǵan er adamdy ustaǵanyn habarlady. Ol ýaqytsha ustaý izoliatoryna qamaldy. "Adam óltirý" baby (QR Qylmystyq kodeksiniń 99-babynyń 2-bóligi) boiynsha qylmystyq is qozǵaldy. Zattai aiǵaqtar tárkilenip, tergeý júrgizilip jatyr.
Adam quqyqtary biýrosy Facebook-te jariialaǵan habarlamaǵa súiensek, Shpanova iri ulttyq jobalarǵa, sonyń ishinde Qashaǵan ken ornyn igerýge bailanysty jobalarǵa qatysqany aitylǵan.
"Sotaldy tergeý barysy Atyraý oblysy Politsiia departamenti basshylyǵynyń baqylaýynda. Áleýmettik jeli qoldanýshylaryn tek resmi derekkózderge súienýge, jalǵan aqparat taratýdan aýlaq bolýǵa shaqyramyz", – dedi Politsiia departamentiniń baspasóz qyzmeti ókili buǵan deiin.
