Atyraýda NCOC kompaniiasynyń menedjeriniń ólimine qatysty kúdikti qamaýǵa alyndy, - dep habarlaidy Dalanews.kz.
Atyraýda tergeý soty elitalyq turǵyn úide NCOC kompaniiasynyń menedjeri Bibigúl Shpanovany qatigezdikpen óldirdi dep aiyptalǵan santehnikti tergeý izoliatoryna qamady.
Marqumdy jaqyndary jer qoinyna tapsyryp, as berildi.
NCOC kompaniiasy qyzmetkerdiń qazasyna bailanysty otbasyna kóńil aityp, kináliler jazalanatynyna senetinin jetkizdi.
"Bibigúl – kásibi ári talantty basshy. Onyń bilimi, tájiribesi men isine adaldyǵy eshqashan umytylmaidy. NCOC kompaniiasy bul qazaǵa qaiǵyryp, Bibigúldiń otbasyna shyn júrekten kóńil aitady. Memlekettik organdar bul sumdyq qylmysty muqiiat tergeitinine senimdimiz. NCOC bul iske bailanysty tiisti organdarǵa tolyq qoldaý kórsetýge daiyn”, - dep málimdedi kompaniia.
Qaiǵyly oqiǵa
Eske salaiyq, 29 sáýirde Atyraýda óz úiinen 45 jastaǵy Bibigúl Shpanova óli tabylǵan bolatyn. Onyń munai-gaz salasynda 20 jyldan asa tájiribesi bar, NCOC kompaniiasynyń bólim basshysy da bolǵan. Politsiia málimetteri boiynsha áieldiń denesinde pyshaq jaraqattary anyqtalǵan, al páterindegi seif ashylǵan.
Marqumnyń týystary Adam quqyqtary biýrosyna júginip, jan-jaqty tergeý júrgizýdi talap etti. Olar qylmystyń sebebi marqumnyń kásibi qyzmetine bailanysty bolýy múmkin dep esepteidi.
Politsiia ne deidi?
Politsiia kúdiktini, iaǵni 1987 jyly týǵan er adamdy ustaǵanyn habarlady. "Adam óltirý" baby (QR Qylmystyq kodeksiniń 99-babynyń 2-bóligi) boiynsha qylmystyq is qozǵaldy. Zattai aiǵaqtar tárkilenip, tergeý júrgizilip jatyr.
Adam quqyqtary biýrosy Facebook-te jariialaǵan habarlamaǵa súiensek, Shpanova iri ulttyq jobalarǵa, sonyń ishinde Qashaǵan ken ornyn igerýge bailanysty jobalarǵa qatysqany aitylǵan.
"Sotaldy tergeý barysy Atyraý oblysy Politsiia departamenti basshylyǵynyń baqylaýynda. Áleýmettik jeli qoldanýshylaryn tek resmi derekkózderge súienýge, jalǵan aqparat taratýdan aýlaq bolýǵa shaqyramyz", – dedi Politsiia departamentiniń baspasóz qyzmeti ókili buǵan deiin.
