Eks-ministr Qýandyq Bishimbaevtyń burynǵy jubaiy Nazym Kaharman balalaryna tólenetin alimentti azaitýǵa baǵyttalǵan áreketter týraly málimdedi, dep habarlaidy Dalanews.kz.
Ol bul jaiynda Instagram paraqshasynda aitty.
Nazym Kaharmannyń aitýynsha, Joǵarǵy sot Qýandyq Bishimbaevty ata-ana quqyǵynan aiyrý týraly shaǵymdy qaraýdan bas tartqannan keiin birneshe ai ótken soń, eks-ministr aliment mólsherin tómendetý jóninde sotqa talap-aryz túsirgen.
Onyń sózinshe, qarsy tarap «Qýandyqtyń aliment tóleýge qarjylyq múmkindigi joq» degen ýáj keltirgen. Alaida Nazym Kaharman bul málimettiń shyndyqqa janaspaitynyn aityp otyr.
"Meniń advokattarym Qýandyqtyń aldaǵy keminde 15 jyl boiy aliment tóleýge tolyq múmkindigi bar ekenin qujattarmen dáleldedi", – deidi ol.
Sondai-aq Kaharman Bishimbaev alimentten jaltarý úshin óz aktivterin 26 jastaǵy úlken ulynyń atyna rásimdegenin aitady. Áńgime birneshe jyljymaityn múlik jaiynda bolyp otyr.
"Balasyna qamqor bolý – durys. Biraq kámeletke tolǵan ulyńnyń paidasyna aktivterdi aýdaryp, kámeletke tolmaǵan balalaryńa aliment tólemeý – bul jiirkenishti jaǵdai. Muny qalai ataýdy da bilmeimin", – dedi ol.
Soǵan qaramastan, sotta Nazym Kaharmannyń talaby qanaǵattandyrylyp, Qýandyq Bishimbaev buryn jasalǵan alimenttik kelisimge sáikes tólem júrgizýge mindetteldi.
"Eger Qýandyq mundai áreketterge barmaǵanynda, qarjy tabý jaǵynan óte qabiletti adam retinde búginde mýltimillioner, tipti milliarder de bolar edi. Ondai jaǵdaida bul kelisim ony qorǵar edi, al men odan artyq talap qoia almas edim", – dep túiindedi ol.
Aita keteiik, Nazym Qaharman Qýandyq Bishimbaevpen 14 jyl nekede bolǵan. Olar 2020 jyly ajyrasyp ketken. Nazym Qaharman men Qýandyq Bishimbaevtyń úsh balasy bar.
Buǵan deiin Qýandyq Bishimbaevtyń burynǵy áieli Nazym Qaharman sot otyrysyna qatysty pikir bildirgen bolatyn. Sot otyrystarynyń birinde Bishimbaev Saltanat pen balalaryn alyp shetelge demalýǵa shyǵar kezde bolǵan jait týraly aityp bergen bolatyn. Qýandyq Bishimbaevtyń sózinshe, Saltanat shetelge shyǵar aldyndaǵy túnde sheteldik tólqujatyn joǵaltyp alǵan.
Osyǵan bailanysty Nazym Saltanatpen ne jaily sóileskenin kórsetken. Saltanat bul jaitqa qatysty Nazymnan birden keshirim suraǵan.
