Qazaqstannyń árbir azamatynyń JSN - jeke sáikestendirý nómiri bar, ol ómir boiy ózgerissiz qalady. Ol boiynsha qazaqstandyqtar memlekettik qyzmetter ala alady jáne memlekettik bazalar tiziminde turady. Orda.kz tuńǵysh prezidenttiń, onyń qyzdary men kúieý balasynyń jeke sáistendirý nómirleri Memlekettik kirister komitetiniń málimetter bazasynan joǵalyp ketkenin anyqtaǵan, - dep habarlaidy Dalanews.kz.
Komitet saitynda izdeý júiesi jumys isteidi, ol boiynsha azamattyń salyq boiynsha qaryzdary bar-joǵyn, sondai-aq, salyq bazasynda mundai adam bar-joǵyn bilýge bolady. Ol úshin izdegen adamnyń JSN-in bilýi kerek.
Basylym iri saqtandyrý kompaniialarynyń biriniń affiliirlengen tulǵalarynyń tizimine qol jetkizgen. Onda bes jyl buryn Timýr men Dinara Qulybaevtar "ALMEKS "Holdingtik toby" AQ-nyń iri aktsionerleri retinde engizilgen. Tiisinshe, olardyń jaqyn týystary qujatqa engizilgen, olarǵa tek balalar men ata-analary emes, baýyrlary da kiredi.
Bul tizimde Qazaqstannyń eks-prezidenti Nursultan Nazarbaevtyń resmi otbasynyń basym bóligi JSN-men birge kórsetilgen. Biraq komitettiń bazasy burynǵy prezidenttiń barlyq otbasy múshelerin kórsete almady.
Mysaly, Memlekettik kirister komitetiniń saity Nursultan Ábishulynyń ózi, onyń qyzdary Dariǵa men Dinara, sondai-aq, kúieý balasy Timýr Qulybaevtyń jeke nómirlerin tappady.
Bul azamattardyń barlyǵy Qazaqstanda turmaidy degen boljam da bar. Óitkeni zań boiynsha JSN-niń qoldanylýyn toqtata turý sebepteriniń biri - azamattyń basqa memleketke turaqty turýǵa ketýi.
"Birinshi prezident pen onyń týystary qandai da bir sebeppen salyq tóleýden bosatyldy degen boljamdy joqqa shyǵaramyz. Birinshiden, mundai jaǵdai Qazaqstan zańnamasynda qarastyrylmaǵan. Ekinshiden, Memlekettik kirister komitetiniń bazasy birinshi prezidenttiń otbasynyń basqa músheleri týraly derekterdi ońai shyǵardy", - dep jazylǵan basylym dereginde.
Sonymen qatar, basylym Sara Alpysqyzynyń derekterin tapqan.
"Qazir ol Nazarbaeva emes, Qonaqai. Bul - onyń qyz kezindegi qysqartylǵan tegi, turmysqa shyqqanǵa deiin Qonakaeva bolǵan. Ol tegin nege ózgertkeni belgisiz. Sonymen qatar, MKK saity Sara Alpysqyzynyń jeke tulǵalardyń múlik salyǵy boiynsha 2102 teńge qaryzy bar ekenin kórsetti", - dep jazylǵan basylym aqparatynda.
Sondai-aq, salyq bazasynda Qazaqstannyń eks-prezidentiniń kishi qyzy bar. Áliia Nursultanqyzy Nazarbaevanyń qaryzdary joq, biraq salyq tóleýshi bolyp sanalady.
Júie Timýr men Dinara Qulybaevtardyń balalaryn da tapqan: 34 jastaǵy Altai Timýruly Qulybaev, 20 jastaǵy Deniza Timýrqyzy Qulybaeva jáne 14 jastaǵy Alisha Timýrqyzy Qulybaeva.
