Depýtat Erlan Sairov sport protsesine bai sheneýnikterdi qatystyrmai, túgel alyp tastaýdy usyndy, dep habarlaidy Dalanews.kz.
Týrizm jáne sport vitse-ministri Serik Jarasbaev Májilis depýtattary aldynda jańa zań jobasyn tanystyryp, sport máselesiniń qazirgi jaǵdaiyna toqtalyp ótti. Osy tusta Jarasbaev elimizde sport túri kóbeigenin, biraq nátije kórsetkishi tómendei bastaǵanyn alǵa tartty.
Vitse-ministrdiń málimetinshe, búginde 180 sport túri bar. Alaida jyl saiyn onyń 30-40 túri qysqaryp otyrady. Tiisinshe 2026 jylǵa deiin 180-niń jartysy qalsa, 2027 jyly 60-70 sport túri bolatynyn aitty.
Al depýtat Edil Jańbyrshin olimpiadalyq sport túrlerine ǵana qarjy bólý durys emes ekenin jetkizdi.
“Jaqsy jumys istep jatqan sport túrlerin damytýymyz kere. Áreń kún kórip júrgen federatsiialardyń bárin joq qylsańyzdar, onda buqaralyq sport túrlerin qalai damytamyz? Bári birdei shańǵy teýip, bári birdei tuǵyrdan sekire almaidy. Boksy damyǵan Mańǵystaýdyń ózinde sport keshenderi jetispeidi. Fýtbol oinaityndai óńirlerde deni durys stadion joq. Aldymen infraqurylymdy damytyńyzdar, sonan soń qarjylandyryńyzdar. Qulybaevtyń adamdary federatsiialardy bólip alyp, aqshany jep otyr. Nege solardy qurtpaisyzdar, álde solarmen birgesizder me?” – dedi depýtat.
Osy tusta depýtat Erlan Sairovtyń Jańbyrshinniń sózin qostap, sporttan bai sheneýnikterdiń kózin qurtýdy usyndy.
“Ministrlikke Qazaqstannyń sporttyq protsesine oligarhtardy qatystyrmai, túgel alyp tastaýdy usynamyn. Qazir Timýr Qulybaev pen onyń qaramaǵyndaǵylar otandyq sportqa kedergi keltirip jatyr. Bul máseleni qalai sheshemiz? Quzyretti ministrliktiń oligarhtardy sporttan qýýǵa quqyǵy bar ma? Sońǵy tórt jylda kórshi Ózbekstanǵa jete almai kelemiz. Áitpese Qazaqstan sportqa 1 mlrd dollar bóledi. Kórshimiz mundai qarjyny bólgen emes. Sonda milliardtyń bári urlanyp jatyr degen sóz ǵoi” – dep sózin jalǵady Sairov.
Al vitse-ministr óz kezeginde jańa zań jobasy boiynsha osy olqylyqtarmen kúresetinin alǵa tartty.
