دەپۋتات ەرلان سايروۆ سپورت پروسەسىنە باي شەنەۋنىكتەردى قاتىستىرماي، تۇگەل الىپ تاستاۋدى ۇسىندى، دەپ حابارلايدى Dalanews.kz.

تۋريزم جانە سپورت ۆيسە-مينيسترى سەرىك جاراسبايەۆ ءماجىلىس دەپۋتاتتارى الدىندا جاڭا زاڭ جوباسىن تانىستىرىپ، سپورت ماسەلەسىنىڭ قازىرگى جاعدايىنا توقتالىپ ءوتتى. وسى تۇستا جاراسبايەۆ ەلىمىزدە سپورت ءتۇرى كوبەيگەنىن، ءبىراق ناتيجە كورسەتكىشى تومەندەي باستاعانىن العا تارتتى.

ۆيسە-مينيستردىڭ مالىمەتىنشە، بۇگىندە 180 سپورت ءتۇرى بار. الايدا جىل سايىن ونىڭ 30-40 ءتۇرى قىسقارىپ وتىرادى. تيىسىنشە 2026 جىلعا دەيىن 180ء-نىڭ جارتىسى قالسا، 2027 جىلى 60-70 سپورت ءتۇرى بولاتىنىن ايتتى.

ال دەپۋتات ەدىل جاڭبىرشين وليمپيادالىق سپورت تۇرلەرىنە عانا قارجى ءبولۋ دۇرىس ەمەس ەكەنىن جەتكىزدى.

“جاقسى جۇمىس ىستەپ جاتقان سپورت تۇرلەرىن دامىتۋىمىز كەرە. ارەڭ كۇن كورىپ جۇرگەن فەدەراسيالاردىڭ ءبارىن جوق قىلساڭىزدار، وندا بۇقارالىق سپورت تۇرلەرىن قالاي دامىتامىز؟ ءبارى بىردەي شاڭعى تەۋىپ، ءبارى بىردەي تۇعىردان سەكىرە المايدى. بوكسى دامىعان ماڭعىستاۋدىڭ وزىندە سپورت كەشەندەرى جەتىسپەيدى. فۋتبول وينايتىنداي وڭىرلەردە دەنى دۇرىس ستاديون جوق. الدىمەن ينفراقۇرىلىمدى دامىتىڭىزدار، سونان سوڭ قارجىلاندىرىڭىزدار. قۇلىبايەۆتىڭ ادامدارى فەدەراسيالاردى ءبولىپ الىپ، اقشانى جەپ وتىر. نەگە سولاردى قۇرتپايسىزدار، الدە سولارمەن بىرگەسىزدەر مە؟” – دەدى دەپۋتات.

وسى تۇستا دەپۋتات ەرلان سايروۆتىڭ ءجاڭبىرشيننىڭ ءسوزىن قوستاپ، سپورتتان باي شەنەۋنىكتەردىڭ كوزىن قۇرتۋدى ۇسىندى.

“مينيسترلىككە قازاقستاننىڭ سپورتتىق پروسەسىنە وليگارحتاردى قاتىستىرماي، تۇگەل الىپ تاستاۋدى ۇسىنامىن. ءقازىر تيمۋر قۇلىبايەۆ پەن ونىڭ قاراماعىنداعىلار وتاندىق سپورتقا كەدەرگى كەلتىرىپ جاتىر. بۇل ماسەلەنى قالاي شەشەمىز؟ قۇزىرەتتى مينيسترلىكتىڭ وليگارحتاردى سپورتتان قۋۋعا قۇقىعى بار ما؟ سوڭعى ءتورت جىلدا كورشى وزبەكستانعا جەتە الماي كەلەمىز. ايتپەسە قازاقستان سپورتقا 1 ملرد دوللار بولەدى. كورشىمىز مۇنداي قارجىنى بولگەن ەمەس. سوندا ميللياردتىڭ ءبارى ۇرلانىپ جاتىر دەگەن ءسوز عوي” – دەپ ءسوزىن جالعادى سايروۆ.

ال ۆيسە-مينيستر ءوز كەزەگىندە جاڭا زاڭ جوباسى بويىنشا وسى ولقىلىقتارمەن كۇرەسەتىنىن العا تارتتى.