Memleket qairatkeri, ǵalym Jaqsybek Qulekeev eks prezident Nursultan Nazarbaevty keshirýdi surady, - dep habarlaidy Dalanews.kz.
Jaqsybek Qulekeev Nazarbaevtyń 30 jyl boiy atqarǵan eńbegi zor ekenin aitady.
"Bári birdei ol kisiden teris ainalyp ketti dep aitý qiyn shyǵar. Janynda júrgen azamattar bar. Nazarbaevtyń ózin de kezeń-kezeńge bólip qaraý kerek. Alǵash egemendik alǵan kezde 2005 jylǵa deiin elbasy óte úlken qyzmet jasady. Jalpy egemendiktiń 30 jyldyǵynda elbasynyń atqarǵan eńbegi zor. Qazaqstandy dúniejúzine tanytty, shekaramyzdy bekitti, ol kisiniń qabileti óte zor azamat.
Al sońǵy 10 shaqty jylda ol kisi óziniń bedelin, biligin jeke basyna, otbasyna kóbirek paidalanyp ketti. Sodan halyq sharshady", - deidi Qulekeev "Suraýy bar" YouTube-arnasyna bergen suhbatynda.
Jaqsybek Qulekeev Nursultan Nazarbaevty keshirýdi surady.
"Elbasy da pende, ol da áke. Ol da ata. Nemere, shóbere súiip otyr. Otbasynyń ainalasyndaǵylarǵa qatysty qoǵamda aitylyp jatqan pikirlerge o kisi alańdamaidy eken, qynjylmaidy eken dep aitý óte qiyn. Ol da et pen súiekten jaralǵan adam ǵoi. Menińshe, o kisini dál qazir tabalaýdyń qajeti joq. Qolymyzdan keletin bolsa, egemendik úshin, keleshek urpaq úshin o kisiniń jaqsy atyn saqtap qalǵan durys.
Elbasy men onyń ainalasynda júrgen adamdardyń ozbyrlyǵyn nemese qylmystyq áreketin bólip qaraǵan jón dep oilaimyn. Prezidenttiń ustap otyrǵan saiasaty da sondai. Memleket úshin, bolashaq urpaqtar úshin, egemendiktiń týyn berik qylý úshin Nazarbaevtyń atqarǵan róli óte joǵary. O kisini qazir qorlaityn bolsaq, ol – egemendikti qorlaǵanmen birdei nárse.
Sondyqtan bul turǵyda men halyqtyń elbasyǵa keshirimdi bolǵanyn qalar edim. Al otbasynyń jaqyn músheleri men otbasyǵa jaqyn azamattar, jaqyndyǵy bolmasa da sol kisiniń janynda júrip kóp paidasyn kórgen azamattar bar. Solardyń isin keshirý-keshirmeý jasaǵan is-áreketterine, qylmysyna bailanysty", - dedi Qulekeev.
Aita keteiik, Qańtar oqiǵasynan keiin áýejaiǵa asyqqan Dariǵa Nazarbaeva sheshesin umytyp ketken degen aqpar taraǵan bolatyn. DALA INSIDE telegram arnasy osy týrasynda oi órbitip, birqatar qyzyqty tezisterdi ortaǵa salǵan tanymal saiasatker Jaqsybek Qulekeevtyń kitabyna qaita úńilgen bolatyn.
Qańtardyń qarsańynda eks-prezident Germaniiada ota jasatqan "santehnik" inisi Bolattyń kóńili suraý úshin Shamalǵanǵa kelgen.
Jaǵdai ýshyqqan tusta Nazarbaev pen keibir áýlet ókilderi brondalǵan kólikpen qyrǵyz shekarasyn kesip ótken. Qyrǵyz jerine tabany tigesin, qaýip bulty seiilip, Nazarbaev klany sol aradan áýejaiǵa jetkizilgen, ári qarai Dýbai qaidasyń dep Arab jerine tartyp otyrǵan.
Qulekeevtiń aitýynsha Áliia áýelden-aq Arab ámirliginde bolǵan. Buǵan onyń keiinnen óshirip tastaǵan áleýmettik jelidegi akkaýnty dálel.
"Servis Áliianyń ornalasqan jerin avtomatty túrde Arab ámirligi dep anyqtady. Jariia tulǵanyń akkaýnty kókpen belgilense, mundai anyqtama qoiylady", – deidi ol.
Qańtar kezinde Nazarbaevtyń basqan keshkenderin kózi qaraqty qaýym shet-shaǵalai biledi. Al eks-prezidenttiń tula boiy tuńǵyshy Dariǵanyń Almatydan shyǵa almai, sory qainaǵanyn bireý bilse, bireý bilmes.
