Onyń sózinshe, toı-dýmanǵa jumsalatyn qarajatqa jaǵdaıy tómen otbasylardy jyl boıy asyraýǵa bolady. Sondyqtan, el Táýelsizdiginiń 25 jyldyǵy qarsańynda aqshany jelge shashpaı, Qazaqstandaǵy árbir azamatqa 25 myń teńgeden bir rettik járdemaqy (nemese syıaqy) bergen abzal dep jazdy bloger óziniń Facebook-paraqshasynda.
«Táýelsizdigimizdiń 25 jyldyǵyna oraı úlken qalalarda kóptegen jıyndar, keshter, toılar ótip jatyr. Mıllıondaǵan qarajatqa alynǵan otshashýlar qanshama otbasynyń bir jyldyq tamaǵy. Keshe biraz aýyldardy aralap, biraz otbasynyń táýelsizdigimizdi toılaý túgili, bala shaǵasyna nan taýyp bere almaı otyrǵan jaǵdaılaryn kórdim.
Meniń sizge usynysym bar: 17-aq mıllıon halqyńyz bar. Árbir QR azamatynyń esep shotyna táýelsizdigimizdiń 25 jyldyǵyna oraı 25 myń teńgeden aýdarsańyz durys bolar edi. Aýyl halqy óz otbasymen táttisin alyp toılap, elimizdiń táýelsizdigin seziner edi. Bir jaǵynan, jyldar boıy shyǵara almaı júrgen halyq sany jaıly statısıkany durystap alar edik. Meniń usynysymdy qabyl alasyz degen úmittemin. Elimizdiń táýelsizdigi berik bolsyn», - deıdi A.Orynbek.
Aıta keteıik, bıyl el Táýelsizdigin atap ótý úshin respýblıkalyq búdjetten 407 mıllıon teńge bólindi. Bul týraly 6 qazan kúni QR Mádenıet jáne sport vıse-mınıstri Aqtoty Raıymqulova málimdegen bolatyn. Onyń aıtýynsha, merekege oraı ótetin is-sharalar 1 jeltoqsannan bastalyp, 15 jeltoqsanǵa deıin jalǵasady. Respýblıka boıynsha barlyǵy 8 myńdaı is-shara ótedi dep josparlanýda.
DEREKKÓZ: sn.kz
