Qazaqstanda áskeri qylmystarǵa qatysty jaǵdai kúrdelene túsken. Finprom.kz sarapshylarynyń quqyqtyq statistikaǵa jasaǵan taldaýyna sáikes 2026 jylǵy qańtar-tamyz ailarynda elde 261 áskeri qylmys tirkelgen. Bul byltyrǵy osyndai kezeńmen salystyrǵanda 1,5 ese kóp, dep habarlaidy dalanews.kz.
Áskeri qylmystardyń jalpy sany 2023 jyldan beri ósip keledi. Al qaralyp jatqan qylmystyq ister sany qańtar-tamyzda 309-ǵa jetip, bir jylda 48,6 paiyzǵa artqan.
Sarapshylar qańtar-shilde ailaryndaǵy tolyq statistikany da taldaǵan. Osy kezeńde áskeri ortadaǵy jarǵydan tys qatynas, iaǵni álimjettik deregi 37 paiyzǵa ósip, 74-ke jetken. Bilikti asyra paidalaný boiynsha 88 jaǵdai tirkelgen. Bul byltyrmen salystyrǵanda 79,6 paiyzǵa kóp. Qyzmetke salǵyrt qaraýdyń 16 deregi anyqtalǵan.
Sonymen qatar, áskeri qyzmetti atqarý tártibin buzýdyń 8, bilikti asyra paidalanýdyń 5 jáne biliktiń áreketsizdiginiń 2 jaǵdaiy tirkelgen.
Áskeri qylmystardan 363 adam zardap shekken
2026 jylǵy segiz aida áskeri qylmystardan zardap shekkender sany 363 adamǵa jetken. Bul byltyrǵy osyndai kezeńnen 2,5 ese kóp jáne 2020 jyldan bergi eń joǵary kórsetkish.
Zardap shekkenderdiń basym bóligi - 20 jasqa tolmaǵan jastar. Biyl olardyń úlesi 70,5 paiyzǵa jetken. Iaǵni áskeri qylmystardan zardap shekken 363 adamnyń 256-sy - 20 jasqa tolmaǵan azamattar.
Sonymen qatar, biyl qańtar-tamyzda arty ólimmen aiaqtalǵan 8 áskeri qylmys tirkelgen. Kaspiidegi oqý-jattyǵý kezinde bolǵan qaiǵyly oqiǵany qosa eseptegende, mundai jaǵdaidyń sany 9-ǵa jetedi.
Áskerdegi sýitsid máselesi de ózekti
2026 jylǵy qańtar-shilde ailarynda alty áskeri qyzmetshi ózine qol jumsaǵan. Olardyń úsheýi kelisimshart boiynsha qyzmet etken, úsheýi merzimdi áskeri qyzmetshi bolǵan. Alty jaǵdaidyń bárinde sýitsidke naqty ne sebep bolǵany anyqtalmaǵan.
Taǵy úsh áskeri qyzmetshi ózine qol jumsaýǵa áreket jasaǵan. Olardyń arasynda jalǵyzdyq, aýyr materialdyq jaǵdai jáne jubaiymen janjal sebep retinde kórsetilgen.
Sarapshylardyń dereginshe, Qazaqstan armiiasynda jyl saiyn sýitsid saldarynan 10-20 áskeri qyzmetshi qaza tabady. Taǵy 5-12 áskeri qyzmetshi ózine qol jumsaýǵa áreket jasaidy.
