Nazarbaevpen bailanysy bar ofshorlyq kompaniia Almaty mańyndaǵy shekaralyq aimaqta zańsyz ondaǵan gektar jerge ielik etip otyr, dep habarlaidy Dalanews.kz "Vyhod k moriý" telegram arnasyna silteme jasap.
Qazaqstannyń tuńǵysh prezidenti Nursultan Nazarbaev jáne milliarder Vladimir Kimmen tyǵyz bailanysy bar Niderlandta tirkelgen «Noord Holland Trading Company B.V.» kompaniiasy Almatynyń elitalyq aýdanynda ornalasqan, quny ondaǵan milliard teńge turatyn jer telimderi men jyljymaityn múlikke ielik etedi. Bul aýmaq – Qazaqstan zańy boiynsha sheteldik kompaniialardyń menshiginde bolmaýy tiis shekaralyq aimaqqa kiredi.
Atalǵan jer telimderi Almatynyń bedeldi Iýbileinyi yqshamaýdanynda, Nazarbaevtyń burynǵy rezidentsiiasyna tiip tur. Osyǵan deiin Nazarbaev otbasyna tiesili bolǵan jyljymaityn múliktiń bir bóligi memleketke qaitarylǵan edi. Biraq aýdandaǵy 13 gektar jer men birneshe záýlim sarai «Noord Holland Trading Company B.V.» baqylaýyna ótip ketken. Bul kompaniianyń túpkilikti iesi Lihtenshteinde tirkelgen ofshorlyq qurylymnyń artynda jasyrylǵan.
Jańadan anyqtalǵan jer ýchaskesiniń jalpy kólemi – 35 gektar. Bul aýmaqta qarapaiym úilermen qatar, erekshe sán-saltanatpen salynǵan birneshe alyp sarai ornalasqan. Sonyń biri – Nazarbaevtyń senimdi serigi ári jeke qarjygeri sanalǵan marqum Vladimir Nidiń otbasyna tiesili. Sondai-aq, jelige tarap ketken derekterge súiensek, bul jerde taǵy bir iri saraiǵa «Qazaqmys» korporatsiiasynyń teń iesi ári milliarder Vladimir Kim ielik etedi. Vladimir Ni qaitys bolǵan soń, Kim Nazarbaevqa jaqyn qarjylyq tulǵa retinde onyń ornyn basqan.
Bul aýmaqta Nazarbaevtyń ózi de jeke menshikke ie. Onyń sarailary «Baitaý» qory jáne «Kapital Invest 2021» kompaniialary arqyly rásimdelgen. Al barlyq aýmaqtyń shamamen jartysy «Almaly» men «Naýryz» kompaniialary arqyly «Noord Holland Trading Company» baqylaýyna berilgen. Nazarbaev qorlary Almatydaǵy áigili «Alataý» sanatoriiiniń aktivterin de osy kompaniiaǵa naryqtaǵydan tómen baǵada satyp jibergen.
«Almatynyń Rýblevkasy» atanyp ketken bul elitalyq aýdandaǵy múliktiń naryqtyq quny óte joǵary – tek jer telimderiniń óz baǵasy keminde 30 mlrd teńgeden asady. Ǵimarattar men sarailardy qosa eseptegende, aktivterdiń jalpy quny 50 mlrd teńgeden joǵary bolýy múmkin.
Mundai qadam Nazarbaev pen ainalasynyń múlikti quqyqtyq júiesi myqty elderge shyǵarý arqyly aktivterin saqtap qalýǵa degen umtylysy bolýy yqtimal. Buǵan «Noord Holland» kompaniiasynyń direktory Anna Berezinanyń nominaldy tulǵa ekendigi dálel. Ol buǵan deiin Vladimir Kim men Edýard Ogaidyń milliardtaǵan aktivteri tirkelgen Resei jáne Niderland azamaty retinde belgili. «Noord Holland Trading Company» kompaniiasynyń shynaiy qojaiyny Lihtenshteindik «Woodbridge Foundation» arqyly jasyrynǵan. Bul qordyń basshysy – Lihtenshtein astanasynyń meri qyzmetine úmitker, zańger Klemens Laternzer de tek nominaldy tulǵa bolyp sanalady. Onyń óz erkimen Qazaqstannan milliardtaǵan teńgege jyljymaityn múlik satyp alýy ekitalai ekeni anyq.
Degenmen, bul jasyryn shemanyń avtorlary kútpegen jerden úlken másele týǵyzýy múmkin. Sebebi Qazaqstan zańnamasy sheteldik azamattar men kompaniialardyń aýyl sharýashylyq jáne shekaralyq aimaqtarda jer ielenýine tyiym salady. Almatynyń shekaralyq aimaǵy retinde Qazaqstan-Qyrǵyzstan shekarasynan 25 shaqyrym aýmaq sanalady, al joǵaryda atalǵan ýchaskeler dál osy aýmaqta ornalasqan. Zań boiynsha mundai jerlerge ie kompaniia sheteldikterdiń baqylaýyna ótken soń úsh aidyń ishinde menshik quqyǵyn Qazaqstan azamattaryna aýdarýy qajet. Eger talap oryndalmasa, jer jergilikti bilik arqyly memleket menshigine qaitarylýy tiis. Qazir atalǵan merzim áldeqashan aiaqtalǵan. Demek, Nazarbaev pen onyń ainalasyndaǵylardyń aktivterinen aiyrylyp qalý qaýpi bar degen sóz.
