Otyrysqa Nursultan Nazarbaev Qorynyń dırektory, "Qazaqstannyń áıelderi kúshteriniń Alánsy" ZTBQ Qamqorshylyq keńesiniń tóraǵasy Darıǵa Nazarbaeva qatysty.
Uıym jumysynyń qorytyndysy týraly "Qazaqstannyń isker áıelderi qaýymdastyǵy" RQB prezıdenti, "Qazaqstannyń áıelderi kúshteriniń Alánsy" ZTB tóraıymy Raýshan Sársembaeva aqparat berdi.
"Aláns osydan týra bir jyl buryn quryldy. Osy ýaqyt ishinde birlestikke qatysýshylar sany Qazaqstan boıynsha 20-dan 138 ÚEU-ǵa deıin keńeıtildi, - dep habarlady R.Sársembaeva. - Biz uıymdyq qurylymdy bekitip, áıelderdiń quqyqtaryn saqtaýdy, olardyń múddelerin ilgeriletýdi qamtamasyz etýge baǵyttalǵan jumys júrgizdik: otbasylyq jáne genderlik saıasat máseleleri jónindegi zań jobasyna 15-ten astam túzetý, otbasylyq-turmystyq saladaǵy zorlyq-zombylyqqa qarsy kúres týraly zań jobasy boıynsha 50-den astam túzetý engizildi".
Raýshan Sársembaeva atap ótkendeı, Aláns partıa quramynda, QR Parlamentinde, memlekettik jáne korporatıvtik sektorlarda áıelderdiń 30 paıyzdyq kvotasyn qamtamasyz etý boıynsha bastamany iske asyrýǵa belsendi qatysty. Aláns músheleri óńirlerdegi daǵdarys ortalyqtarynyń jumysyna monıtorıń júrgizýge de qatysty.
Otyrysta Qazaqstandaǵy áıelderdiń ómir súrý sapasyn arttyrý jónindegi 2021-2023 jyldarǵa arnalǵan Alánstyń Jol kartasy talqylandy.
Usynylǵan josparlarǵa sáıkes, aldaǵy úsh jyl ishinde Aláns áıelder men balalardyń quqyqtaryn qorǵaýdy qamtamasyz etý jónindegi qyzmetti jetildirý, zańnamaǵa ózgerister engizý, turmystyq zorlyq-zombylyq profılaktıkasy jónindegi is-sharalardy uıymdastyrý jáne t. b. máselelerde óńirlerdiń ákimdikterimen yntymaqtastyqty nyǵaıtý boıynsha jumys isteıtin bolady.
Otyrysta sóz sóılegen Darıǵa Nazarbaeva "Qazaqstannyń áıelderi kúshteriniń Alánsy" Keńesiniń atqarǵan jumysyn maquldap, ortaq problemalardy sheshý úshin eldegi áıelder ÚEU-yn biriktirýdiń mańyzdylyǵyn atap ótti. Keńes tóraǵasy: "Balalar men áıelderdi qorǵaý, olarǵa áleýmettik jáne psıhologıalyq qoldaý kórsetý - memlekettik saıasattyń mańyzdy bóligi. Óńirlik áleýmettik qyzmetter jumysynyń anyqtalǵan problemalyq máselelerin júıeleý qajet. Osynyń negizinde Aláns Keńesine olardyń tıimdiligin arttyrý jóninde usynystar ázirleý kerek", - dep atap ótti.
Sonymen qatar, Darıǵa Nazarbaeva Áıelderdiń ózin-ózi tanytýyna qoldaý kórsetý qajettigine basa nazar aýdardy:
"Árbir áıelge súıikti isimen aınalysýǵa múmkindik berý mańyzdy. Ol úshin oǵan psıhologıalyq, bilim berý, áleýmettik salada qoldaý kórsetý kerek".
Ol ÚEU ákimdikterdi tarta otyryp, óńirlerde áıelderdi bıznes júrgizýge oqytýdy uıymdastyrý máselesin pysyqtaý qajet ekenindigin de aıtty.
Otyrysta Alánstyń jańa uıymdyq qurylymy qabyldandy. Qamqorshylyq keńes otyrysynyń qorytyndysy boıynsha aıtylǵan usynystar memlekettik organdarǵa beriledi.
