QR Aqparat jáne qoǵamdyq damý mınıstrligi men Halyqaralyq Túrki akademıasy birlesip, túrkitildes elderdiń jas ǵalymdarynyń «Elbasy – túrki ıntegrasıasynyń sáýletshisi» atty ǵylymı-praktıkalyq onlaın-konferensıasyn ótkizdi. Konferensıa aıasynda «Ǵylym jáne bilim», «Ekonomıka jáne tranzıt» jáne «Túrkologıa» baǵyttary boıynsha seksıalyq jumystar uıymdastyryldy, – dep habarlaıdy Dalanews.kz.

Konferensıanyń ashylýyna QR Aqparat jáne qoǵamdyq damý vıse-mınıstri Asqar Ýmarov qatysty. Ol jas ǵalymdar arasyndaǵy baılanysty jan-jaqty nyǵaıtý jolyndaǵy is-sharanyń ózektiligin atap ótip, Elbasy Nursultan Nazarbaevtyń búginde tıimdi jumys istep jatqan Túrki áleminde memleketaralyq ınstıtýttar qurýdaǵy erekshe rólin atap ótti.

Óz kezeginde Halyqaralyq Túrki akademıasynyń prezıdenti Darhan Qydyráli ǵylymı ıntegrasıany damytý úshin atqarylyp jatqan jumystar týraly aıtyp berdi.

Sondaı-aq, ol Túrki akademıasyn qurý ıdeıasy N.Á.Nazarbaevqa tıesili ekenin, joba 2009 jyldan beri tabysty jumys istep kele jatqanyn eske saldy.

Ol atap ótkendeı, búgingi halyqaralyq konferensıaǵa Qazaqstan, Ázirbaıjan, Túrkıa, Reseı, Qyrǵyzstan, Mońǵolıa, Tájikstan, Ózbekstan jáne Vengrıa ǵalymdary qatysty.

Konferensıa barysynda Elbasy N.Á.Nazarbaevtyń Túrki áleminiń ıntegrasıalyq úderisterindegi róli týraly baıandamalarmen H.A. Iassaýı atyndaǵy HQTÝ, Túrkıa Respýblıkasynyń A.Evran atyndaǵy ýnıversıteti, Nursultan Nazarbaev qory, Álemdik ekonomıka jáne saıasat ınstıtýty, Baký memlekettik ýnıversıteti, Ózbekstan Respýblıkasynyń Ǵylym Akademıasy, Qazan federaldyq ýnıversıtetiniń Halyqaralyq qatynastar ınstıtýty jáne t. b. joǵary oqý oryndarynyń, ǵylymı-praktıkalyq ortalyqtardyń ókilderi sóz sóıledi.