Nazarbaev: "Qasietti qazaq jeri senimdi qorǵalǵan"
Qasietti jerimiz kókte de, jerde de, sýda da senimdi qorǵalǵan. Bul týraly búgin QR Qarýly Kúshteriniń 25 jyldyǵy men Jeńis kúnine arnalǵan áskeri sherý barysynda Elbasy Nursultan Nazarbaev aitty, dep habarlaidy QazAqparat.
«El táýelsizdigimen birge biyl Qarýly Kúshterimizdiń 25 jyldyq merekesin atap ótip otyrmyz. Men shirek ǵasyr buryn táýelsiz elimizdiń tól armiiasyn qurý týraly dál búgingi kúni Jarlyqqa qol qoiǵan bolatynmyn. Sodan beri az ǵana ýaqyt ótse de Qarýly Kúshterimiz bes qarýy sai zamanaýi úlgidegi aibyndy armiiaǵa ainaldy. Saiyp qyran sarbazdarymyz búginde uly dalanyń senimdi qorǵany, azamattyǵymyzdyń almas aldaspany. Biz qazirgi zaman talaptaryna sai keletin, áleýetti áskerimizdi jasaqtadyq. El qaýipsizdiginiń basty baǵyttary aiqyndaldy. Áskeri doktrinamyz qabyldandy. Ekonomikamyz qarqyndy damyǵan saiyn elimizdiń Qarýly Kúshteri de jetilip, nyǵaia tústi. Áskeri qaýipsizdigimiz «Qazaqstan-2050» baǵdarlamanyń basty baǵyttarynyń biri bolyp sanalady. Jaýyngerimiz álemniń ártúrli túkpirinde bitimgershilik missiialardy ózine alyp, abyroimen atqaryp shyqty. Bizdiń áskerimiz TMD elderiniń ishinde aldyńǵy qatarly ásker retinde tanyldy», - dedi Elbasy.
QR Prezidenti jeriniń tutastyǵyn oilaityn elimiz beibit ómirde baiandy baqytqa balaǵanyn, tarihymyz óshpes erliktiń jylnamasy, jeńimpazdyqtyń shejiresi ekendigin basa aitty. «Bahadúr babalardyń izbasarlary qazir Táýelsiz Qazaqstan áskeriniń sapynda tur. «Jaýyngerlik tárbie áskeri kiimnen emes, jórgekten bastalady» dep batyr babamyz Baýyrjan Momyshuly aitqan bolatyn. Jeriniń qaýipsizdigin, eliniń tynyshtyǵyn qorǵaý ár azamattyń qasietti paryzy, abyroily mindeti bolyp sanalady. Sizder elimizdiń shekarasy berik, shebi bútin bolýy úshin qaltqysyz qyzmet etip kelesizder. Búginde qasietti jerimiz kókte de, jerde de, sýda da senimdi qorǵalatynyn kórip otyrmyz. Qazaqstan armiiasynyń búgingi saltanatty sherýi osynyń aiqyn kórinisi bolyp tabylady», - dedi Nursultan Nazarbaev.
