«ەل تاۋەلسىزدىگىمەن بىرگە بيىل قارۋلى كۇشتەرىمىزدىڭ 25 جىلدىق مەرەكەسىن اتاپ ءوتىپ وتىرمىز. مەن شيرەك عاسىر بۇرىن تاۋەلسىز ەلىمىزدىڭ ءتول ارمياسىن قۇرۋ تۋرالى ءدال بۇگىنگى كۇنى جارلىققا قول قويعان بولاتىنمىن. سودان بەرى از عانا ۋاقىت وتسە دە قارۋلى كۇشتەرىمىز بەس قارۋى ساي زاماناۋي ۇلگىدەگى ايبىندى ارمياعا اينالدى. سايىپ قىران ساربازدارىمىز بۇگىندە ۇلى دالانىڭ سەنىمدى قورعانى، ازاماتتىعىمىزدىڭ الماس الداسپانى. ءبىز قازىرگى زامان تالاپتارىنا ساي كەلەتىن، الەۋەتتى اسكەرىمىزدى جاساقتادىق. ەل قاۋىپسىزدىگىنىڭ باستى باعىتتارى ايقىندالدى. اسكەري دوكترينامىز قابىلداندى. ەكونوميكامىز قارقىندى دامىعان سايىن ەلىمىزدىڭ قارۋلى كۇشتەرى دە جەتىلىپ، نىعايا ءتۇستى. اسكەري قاۋىپسىزدىگىمىز «قازاقستان-2050» باعدارلامانىڭ باستى باعىتتارىنىڭ ءبىرى بولىپ سانالادى. جاۋىنگەرىمىز الەمنىڭ ءارتۇرلى تۇكپىرىندە بىتىمگەرشىلىك ميسسيالاردى وزىنە الىپ، ابىرويمەن اتقارىپ شىقتى. ءبىزدىڭ اسكەرىمىز تمد ەلدەرىنىڭ ىشىندە الدىڭعى قاتارلى اسكەر رەتىندە تانىلدى»، - دەدى ەلباسى.
ق ر پرەزيدەنتى جەرىنىڭ تۇتاستىعىن ويلايتىن ەلىمىز بەيبىت ومىردە باياندى باقىتقا بالاعانىن، تاريحىمىز وشپەس ەرلىكتىڭ جىلناماسى، جەڭىمپازدىقتىڭ شەجىرەسى ەكەندىگىن باسا ايتتى. «ءباھادۇر بابالاردىڭ ءىزباسارلارى ءقازىر تاۋەلسىز قازاقستان اسكەرىنىڭ ساپىندا تۇر. «جاۋىنگەرلىك تاربيە اسكەري كيىمنەن ەمەس، جورگەكتەن باستالادى» دەپ باتىر بابامىز باۋىرجان مومىش ۇلى ايتقان بولاتىن. جەرىنىڭ قاۋىپسىزدىگىن، ەلىنىڭ تىنىشتىعىن قورعاۋ ءار ازاماتتىڭ قاسيەتتى پارىزى، ابىرويلى مىندەتى بولىپ سانالادى. سىزدەر ەلىمىزدىڭ شەكاراسى بەرىك، شەبى ءبۇتىن بولۋى ءۇشىن قالتقىسىز قىزمەت ەتىپ كەلەسىزدەر. بۇگىندە قاسيەتتى جەرىمىز كوكتە دە، جەردە دە، سۋدا دا سەنىمدى قورعالاتىنىن كورىپ وتىرمىز. قازاقستان ارمياسىنىڭ بۇگىنگى سالتاناتتى شەرۋى وسىنىڭ ايقىن كورىنىسى بولىپ تابىلادى»، - دەدى نۇرسۇلتان نازاربايەۆ.
