Elbasy Nursultan Nazarbaev Máskeýde Reseı prezıdenti Vladımır Pýtınmen kezdesti. Júzdesýde eki eldiń Eýrazıalyq ekonomıkalyq odaq aıasyndaǵy seriktestigi máselesin qozǵady, – dep habarlaıdy tuńǵysh prezıdent saıty.

Óz kezeginde Nazarbaev Reseı Qazaqstannyń barlyq sala boıynsha senimdi seriktesi ekenin atap ótti.

– Integresıalyq birlestik jumys istep jatyr ári múmkindigi mol dep esepteımin. Qurmetti tóraǵasy retinde onyń aldaǵy ýaqytta damýyna qoldaý kórsetemin, – dedi  Nazarbaev.

Budan bólek, Nazarbaev pen Pýtın ǵylym jáne bilim salasyndaǵy áriptestik máselesine erekshe kóńil bóldi. Máskeýde Nursultan Nazarbaev sondaı-aq M.Lomonosov atyndaǵy Máskeý memlekettik ýnıversıtetine barady.

​Sońǵy bes jyl ishinde Elbasy Nursultan Nazarbaev Reseıge 16 ret bardy. Ótken jyldyń jeltoqsanynda Nazarbaev EAEO Joǵary Eýrazıalyq ekonomıkalyq keńesiniń qurmetti tóraǵasy retinde Sankt-Peterbýrgte ótken EAEO samıtine qatysty. Sondaı-aq, Elbasy Táýelsiz Memleketter Dostastyǵyna qatysýshy memleketter basshylarynyń beıresmı kezdesýinde boldy.

Ótken aptada, 7 naýryzda Nazarbaev Pýtınmen telefon arqyly sóılesken bolatyn. Taraptar ekijaqty jáne halyqaralyq kún tártibindegi ózekti máseleler, sonyń ishinde Sırıa máselesi boıynsha ótken Reseı-Túrkıa kelissózderiniń qorytyndysy boıynsha pikir almasty.