ەلباسى نۇرسۇلتان نازاربايەۆ ماسكەۋدە رەسەي پرەزيدەنتى ۆلاديمير پۋتينمەن كەزدەستى. جۇزدەسۋدە ەكى ەلدىڭ ەۋرازيالىق ەكونوميكالىق وداق اياسىنداعى سەرىكتەستىگى ماسەلەسىن قوزعادى، – دەپ حابارلايدى تۇڭعىش پرەزيدەنت سايتى.

ءوز كەزەگىندە نازاربايەۆ رەسەي قازاقستاننىڭ بارلىق سالا بويىنشا سەنىمدى سەرىكتەسى ەكەنىن اتاپ ءوتتى.

– ينتەگرەسيالىق بىرلەستىك جۇمىس ىستەپ جاتىر ءارى مۇمكىندىگى مول دەپ ەسەپتەيمىن. قۇرمەتتى ءتوراعاسى رەتىندە ونىڭ الداعى ۋاقىتتا دامۋىنا قولداۋ كورسەتەمىن، – دەدى  نازاربايەۆ.

بۇدان بولەك، نازاربايەۆ پەن پۋتين عىلىم جانە ءبىلىم سالاسىنداعى ارىپتەستىك ماسەلەسىنە ەرەكشە كوڭىل ءبولدى. ماسكەۋدە نۇرسۇلتان نازاربايەۆ سونداي-اق م.لومونوسوۆ اتىنداعى ماسكەۋ مەملەكەتتىك ۋنيۆەرسيتەتىنە بارادى.

​سوڭعى بەس جىل ىشىندە ەلباسى نۇرسۇلتان نازاربايەۆ رەسەيگە 16 رەت باردى. وتكەن جىلدىڭ جەلتوقسانىندا نازاربايەۆ ەاەو جوعارى ەۋرازيالىق ەكونوميكالىق كەڭەسىنىڭ قۇرمەتتى ءتوراعاسى رەتىندە سانكت-پەتەربۋرگتە وتكەن ەاەو سامميتىنە قاتىستى. سونداي-اق، ەلباسى تاۋەلسىز مەملەكەتتەر دوستاستىعىنا قاتىسۋشى مەملەكەتتەر باسشىلارىنىڭ بەيرەسمي كەزدەسۋىندە بولدى.

وتكەن اپتادا، 7 ناۋرىزدا نازاربايەۆ پۋتينمەن تەلەفون ارقىلى سويلەسكەن بولاتىن. تاراپتار ەكىجاقتى جانە حالىقارالىق كۇن تارتىبىندەگى وزەكتى ماسەلەلەر، سونىڭ ىشىندە سيريا ماسەلەسى بويىنشا وتكەن رەسەي-تۇركيا كەلىسسوزدەرىنىڭ قورىتىندىسى بويىنشا پىكىر الماستى.