Qazaqstannyń eks-prezidenti Nursultan Nazarbaev pen Ózbekstannyń eks-basshysy Islam Karimov Qyrǵyzstandy 1991-2005 jyldary aralyǵynda basqarǵan Asqar Aqaevty táýelsiz media men jýrnalisterdi qoldaǵany úshin synaǵan. Bul týraly Aqaev «Nakta» podkastynda aityp berdi, - dep habarlaidy Dalanews.kz.
Aqaevtyń sózinshe, ol Qyrǵyzstanda amerikalyq táýelsiz medialardyń ashylýyna qatty qyzyqqan.
«Resmi saparlardyń birinde Freedom House uiymy (demokratiiany jáne adam quqyqtaryn qorǵaityn uiym) maǵan premiia berip, meni táýelsiz memleketter arasyndaǵy eń demokratiialyq prezident dep tanydy. Olar elimizde táýelsiz medialarǵa kómektesetin ortalyq ashýdy usyndy. Men qyzyǵýshylyq tanytyp, ruqsatymdy berip, Freedom House sol ortalyqty basqarýmen ainalysty», - deidi Aqaev.
Aqaevtyń sózinshe, onyń táýelsiz medialardy qoldaý ideiasyn Nazarbaev pen Karimov unatpaǵan.
«Kórshi eldiń basshylarmen bolǵan kezdesýdiń birinde Karimov pen Nazarbaev «Ái, demokrat, sen ne isteseń de óziń bilesiń ǵoi, biraq seniń elińdegi tipografiiadan shyǵatyn gazetter ne úshin bizdi synap, material jazyp júr?» dedi. Sebebi tipografiiadan shyqqan gazetter Almaty men Tashkentte de taratylǵan», - deidi Aqaev.
Qyrǵyzstannyń burynǵy prezidenti sol ortalyqty ashýy qate sheshim bolǵanyn aitady. Onyń sózinshe, jýrnalisterdiń dáleldenbegen syni materialdarynyń saldarynan 2005 jyly naýryzda memlekettik tóńkeris bolǵan. Aqaev Freedom House memlekettik tóńkeris jasaýdy qarjylandyrǵanyn aitady.
Eske salaiyq, buǵan deiin Qyrǵyzstannyń burynǵy prezidenti Asqar Aqaev joǵary keńeske eks-prezident mártebesin qaitarýdy surap ótinish bildirgen bolatyn.
Bul týraly Konstitýtsiialyq zańnama, memlekettik qurylym, sot-quqyqtyq máseleler jáne reglament jónindegi parlament komitetiniń tóraǵasy Cholpon Sultanbekova málimdedi.
Sultanbekovanyń aitýynsha, Aqaevtan hat oǵan 5 qyrkúiek kúni tańda kelip túsken. Al Jogorký Keneshtiń spikeri Nurlanbek Shákievtiń atyna 30 shildede kelip túsken. Depýtat Aqaevqa eks-prezident mártebesin qaitarý máselesi kún tártibine enip-enbeitinin jáne qashan talqylanatynyn túsindirdi.
«Aldymen fraktsiialar, olardyń jetekshileri jáne depýtattarmen kelissózder júrgiziledi. Osydan keiin máseleni talqylaýǵa shyǵaratyn kúndi jariialaimyz», – dep túsindirdi ol.
Keiinnen parlament Aqaevtyń ótinishin qanaǵattandyrmaǵany belgili boldy.
Aita keteiik, Asqar Aqaevtyń uly Aidar Aqaev 1998 jyly Nursultan Nazarbaevtyń qyzy Áliia Nazarbaevaǵa úilengen bolatyn. Ol kezde Áliia 18 jasta bolǵan. Aidar Aqaev 2020 jyly aqpanda 44 jasynda Máskeýde qaitys boldy.
Asqar Aqaev – táýelsiz Qyrǵyzstannyń alǵashqy prezidenti. Ol respýblikaǵa 2005 jylǵa deiin basshylyq etti. 2005 jylǵy 24 naýryzda Aqaevtardyń otbasylyq biligine qarsy baǵyttalǵan halyqtyq kóterilis nátijesinde ol prezidenttik qyzmetten qulatyldy. Sol jyly Jogorký Kenesh ony «alǵashqy prezident» mártebesinen aiyrdy. 2010 jyly ýaqytsha úkimet te óziniń jarlyǵymen Asqar Aqaevty «eks» mártebesinen aiyrdy.
