Azamattyq qoǵam qurylǵanda ózge ulttyń ókilderi de Memleket basshysy bolyp sailanýǵa múmkindik almaq. Bul týraly búgin aqparat quraldarynda jariialanǵan Nursultan Nazarbaevtyń Qazaqstan halqyna arnalǵan Joldaýynda aityldy.
«Orys tilin bilý mańyzdy bolyp qala beredi. 2016 jyldan beri jańartylǵan baǵdarlama boiynsha orys tili qazaq mektepterinde 1-synyptan bastap oqytylyp keledi. 2019 jyldan 10-11-synyptardaǵy jaratylystaný ǵylymynyń jekelegen pánderin oqytýdy aǵylshyn tiline kóshirý bastalatyn bolady», - dedi Nursultan Nazarbaev Qazaqstan halqyna arnalǵan Joldaýynda.
Sonyń nátijesinde, Nazarbaevtyń aitýynsha, bizdiń barlyq túlekterimiz Qazaqstanda jáne jahandyq álemde ómir súrip, jumys isteýi úshin qajetti deńgeide úsh tildi meńgeretin bolady.
«Sonda ǵana naǵyz azamattyq qoǵam qurylady. Kez kelgen etnikalyq toptyń ókili kez kelgen jumysty tańdai alady, tipti Prezident bolyp sailanýǵa da múmkindigi bolady. Qazaqstandyqtar birtutas ultqa ainalady», - dedi Nursultan Nazarbaev.
Azattyq radiosynyń dereginshe 77 jasar Nazarbaev eldi 1991 jyldyń 10 qańtarynan beri basqaryp keledi.
Sodan beri ol osy qyzmetke birneshe márte sailandy.
1990 jyly 24 sáýirde Qazaq SSR-inde alǵash ret prezident qyzmeti engizildi. Joǵary Keńes bul qyzmetke sol kezde respýblika kompartiiasyn basqarǵan Nursultan Nazarbaevty sailady. Ol 1989 jyly 22 maýsym kúni Qazaq SSR kompartiiasy ortalyq komitetiniń birinshi hatshysy bolyp taǵaiyndalǵan.
Qazaqstanda 1999 jyly merziminen buryn ótken prezident sailaýy kezinde Nursultan Nazarbaevtyń sailaý shtaby sailaý bitken soń «Otan» saiasi partiiasyna ainaldy. Keiin ataýyn «Nur Otan» partiiasy dep ózgertken saiasi uiym qazir Qazaqstanda zań shyǵarýshy, atqarýshy jáne jergilikti ókildi organdardy baqylap otyr.
2010 jyly 15 maýsym kúni Qazaqstanda bilikte otyrǵan eldiń tuńǵysh prezidenti Nursultan Nazarbaevqa «Elbasy» (oryssha «Lider natsii») degen resmi ataq berý zańmen bekitildi.
Zań boiynsha, Elbasynyń beinesin búldirý áreketterin jasaǵandarǵa aiyppul nemese bir jylǵa deiin bas bostandyǵynan aiyrý, al baspasóz quraldary arqyly jasalǵan naq sol áreketter úshin úsh jylǵa deiin bas erkindiginen aiyrý jazasy qarastyrylǵan. Zańda Nursultan Nazarbaev pen onyń otbasyna qol tigizbeý quqyǵy da atap jazylyp, ony buzǵandarǵa bes jylǵa deiin bas erkindiginen aiyrý jazasy belgilendi.
