Túrkimenstan prezidenti Gýrbangýly Berdimuhammedovtiń áni qyrkúiekte Ashǵabatta ótetin Aziia oiyndarynyń gimni bolyp bekitildi. Ortalyq Aziiada esimi ánuran avtorlary qatarynda kórsetilgen taǵy bir prezident bar. Nursultan Nazarbaev – Qazaqstannyń memlekettik ánurany mátini avtorlarynyń biri.
Azattyqtyń Túrkimen qyzmeti resmi baspasózge silteme jasai otyryp, sáýirdiń 8-i kúni arnaiy jinalysta Aziada oiyndarynyń ánurany bekitilgenin habarlady. Jýyrda Avaza kýrort aimaǵynda ótken kontsertte prezident Berdimuhamedovtiń ózi shyrqaǵan ári ózi usynǵan «Týǵan ólkem Túrkimenstanym alǵa, tek alǵa qaryshta!» degen ánin jinalysqa qatysýshylardyń bári quptaǵan.
TDH memlekettik aqparattyq agenttigi «Jaryqqa shyqqannan bastap bul ándi otandastarymyz búkil júregimen qabyldady, sondyqtan ony Ashǵabat-2017 oiyndarynyń ánurany retinde tańdaý usynyldy, bul oidy jinalysqa qatysýshylardyń bári quptady» dep habarlaidy.
Ulttyq baspasóz prezident Berdimuhamedovtiń «Týǵan ólkem Túrkimenstanym, alǵa, tek alǵa qaryshta!» degen shyǵarmasyn patriottyq úndeý án dep ataǵan.
BAQ«Bul týyndynyń sózi men mýzykasy táýelsiz ári beitarap Túrkimenstan úshin keýdesin maqtanysh pen baqyt kernegen milliondaǵan azamattarymyzdyń asqaq sezimderin barynsha dál jetkizedi» dep jazyp jatyr.
Erterekte Túrkimenstan aqparat quraldarynda Berdimuhamedovtiń qyrkúiektiń 17-si men 27-si kúnderi aralyǵynda Ashǵabatta ótetin Aziada oiyndary ánuranyn ázirleý úshin shyǵarmashylyqpen ainalysatyn qyzmetkerler arasynda konkýrs jariialaýdy tapsyrǵanyn habarlaǵan. Prezident tapsyrmasy naýryzdyń 24-i kúni berilgen. Konkýrs jariialanǵan ia jariialanbaǵany, ózge úmitkerler bolǵan ia bolmaǵany belgisiz.
Bilikte otyrǵanyna toǵyz jarym jyl bolǵan prezident ári úkimet basshysy Gýrbangýly Berdimuhamedov jurt aldynda alǵash ret 2010 jylǵy maýsymda Túrkimenbashy qalasynda óner kórsetip, balalardyń aldynda akkordeonda oinaǵan. Sol kezden beri ol sahnaǵa talai márte shyǵyp, túrli ánder shyrqap júr.
Ol jalǵyz emes...
Berdimuhamedov – Ortalyq Aziiadaǵy án aitatyn jalǵyz prezident emes. Kontsertterde Tájikstan prezidenti Emomali Rahmon da qolyna jii mikrofon alyp, ánshilermen birge án aitady.
76 jastaǵy prezident Nursultan Nazarbaevtyń da án aityp, dombyra shertkenin jii kórýge bolady.
Byltyr Qazaqstan prezidentiniń saitynda avtory Nazarbaev dep habarlanǵan tórt án jariialandy. Biraq Nazarbaev álgi ánderdiń sózi men mýzykasyn qatar jazdy ma, álde bireýiniń sózin jazyp, endi bireýiniń ánin shyǵardy ma - túsiniksiz.
Prezidenttiń resmi veb-resýrsynda «Jerim meniń» jáne «Elim meniń» degen eki patriottyq kompozitsiia men avtordyń balalyq shaǵyn, áke-sheshesi men týǵan aýylyna degen saǵynyshyn sipattaityn «Úshqońyr», «Shubar at» degen eki kompozitsiiasy jariialanǵan.
Prezident ákimshiligi saity men Facebook jelisindegi Aqorda paraqshasynda Nursultan Nazarbaev Qazaqstannyń memlekettik ánurany mátini avtorlarynyń biri dep kórsetilgen. Byltyr jeltoqsanda Almatyda prezident muraǵaty uiymdastyrǵan "Jasampazdyq pen tabystyń qazaqstandyq joly" dep atalatyn kórmege kelýshilerge Qazaqstannyń jańa ánurany mátinine Nazarbaevtyń qolymen engizilgen túzetýlerdi kórsetken.
Derekkóz: Azattyq radiosy
Copyright (c) 2013. RFE/RL, Inc. Reprinted with the permission of Radio Free Europe/Radio Liberty, 1201 Connecticut Ave., N.W. Washington DC 20036.
