– 937 mlrd teńgeden asa somaǵa deldaldyq shema men qarjylyq zań buzýshylyqtar anyqtaldy. Onyń 123 mlrd teńgesin quqyq qorǵaý organdary anyqtady, – dedi QazaqGaz kompaniiasynyń qazirgi tóraǵasy Sanjar Jarkeshov 6 maýsymda májilistegi úkimet saǵatynda.
Onyń sózinshe, kompaniia qyzmetine bailanysty tolyq aýdittik tekseris júrgizilgen. Jarkeshov 123 mlrd teńge boiynsha qarjylyq zańnama buzylǵanyn aityp, QazaqGaz kompaniiasynda «kóp másele jinalyp qalǵan» dedi.
Ol úÚkimettiń sheshimimen «QazTransGaz» ataýyn QazaqGaz dep ózgerip, ulttyq kompaniia statýsyn alǵanyn, «Samuryq Qazyna» qorynyń quramyna kirgenin de atap ótti.
Jergilikti basylymdardyń jazýynsha, kompaniia quramy naýryz ortasynda tolyq jańarǵan. Nazarbaevtyń qyzy Dariǵa Nazarbaevanyń beiresmi kúieýi sanalatyn Qairat Sháripbaev bul kompaniiany 2014 jyldan beri basqaryp kelgen edi.
Qańtar oqiǵasynan keiin Nursultan Nazarbaevtyń kúieýbalalary, onyń ishinde Sháripbaev ta bar, qyzmetten ketken edi.
Sháripbaev tóraǵalyqtan ketken soń kompaniiany ýaqytsha basqarǵan Ibýlla Serdige ótken aptada izdeý jariialaǵan edi. Jergilikti basylymdardyń jazýynsha, Serdi keiingi 20 jylda biraz jerde mańyzdy qyzmetterde bolǵan.
Biyl qańtarda Jańaózende suiytylǵan gaz baǵasynyń qymbattaýynan soń jurt narazylyqqa shyǵyp, sońy tártipsizdikke ulasqan edi.
5 qańtarda prezident Qasym-Jomart Toqaev «suiytylǵan gaz baǵasynyń qymbattaýyna energetika ministrligin, «QazMunaiGaz» jáne osy QazaqGaz kompaniiasyn aiyptaǵan» edi.
Toqaev kemi 238 adam qaza bolǵan Qańtar oqiǵasynyń basty sebebin «áleýmettik teńsizdik» jáne «bai men kedei arasyndaǵy aiyrmashylyqtyń arasyndaǵy alshaqtyq» degen. Qazaqstan prezidenti eldegi bailyqtyń jartysyn 162 adam ielenip otyr dep málimdegen edi.
