Nazarbaev Ziiatkerlik mektepterindegi jaǵdai baryp turǵan ádiletsizdik!
Nazarbaev mektebindegi memlekettik tilge jasalǵan bul ádiletsiz shabýyl bastala salysymen, parlamentte til máselesin kóterip júrgendikten bolar, zábir kórgen ata-analar birden bizge hat jazdy.
“2022-2023 oqý jylyna Almaty qalasy himiia-biologiia baǵytyndaǵy Nazarbaev ziiatkerlik mektebine 2178 oqýshy synaq tapsyrǵan.
Onyń ishinde qazaq tiline 1483 bala - 68 paiyz, al orys tiline 695 bala - 32 paiyzdy qurap otyr. Iaǵni, qazaq tiline oqýǵa tapsyrǵandar sany eki eseden asyp tur.
Eki tilde tapsyrǵan úmitkerlerdiń arasynda “Órken” grantyn iemdengenderdiń kórsetkishteri qazaq tili max: 1424 ball – min: 1186, orys tili max: 1404 ball – min: 1126 ball”-dep jazady ashynǵan ata-analar.
Sonda orys synybyna tapsyrǵan balalar 1126 balmen oqýǵa túsken de, qazaq synybyna tapsyrǵandar 1186 balmen, orys synybyna túsken oqýshydan 60 bal joǵary alsa da, oqýǵa túse almaǵan?!. Qazaq synybyna tapsyrǵan 140-shy balanyń balynyń ózi 1127 bal, iaǵni orys synybyna túsken 1126 bal jinaǵan baladan qazaq synybyna tapsyrǵan, biraq oqýǵa túse almaǵan 40 balanyń baly joǵary!?.
Nege 40 bala oqýǵa túse almaǵan joǵary bal jinasa da? Qazaq bolǵany úshin, ozat bolǵany úshin, eń bastysy - qazaq synybyna tapsyrǵany úshin!!! Iá, “Azattyq radiosyna” suqbat bergen Timýr Shyntaev bastaǵan ata-analar týra osylai: “Balamyz joǵary bal alsa da, oqýǵa qabyldanbadyq, bizdiń aiybymyz qazaq synybyna tapsyrǵanymyz úshin, qazaq bolǵanymyz úshin”-dep jaýap berdi.
Bul baryp turǵan masqara diskriminatsiia! Memlekettegi Memlekettik tilge diskriminatsiia! Bizde ulty, tili úshin diskriminatsiiaǵa ushyratýǵa bolmaidy degen 14 bap bar emes pe? Osy bizdiń Konstitýtsiianyń baptary tek ózge etnostar úshin jazylǵan ba, qazaqqa paidasy tietin kezi bola ma, bolmai ma?
2020-2021 oqý jylynda 5 qazaq synyby, 3 orys synyby bitirdi. Osy jyly 5 qazaq synyby, 3 orys synyby qabyldandy. Biyl , iaǵni 2021-2022 oqý jyly 5 qazaq synyby (120 oqýshy), 2 orys synyby (40 oqýshy) mektep bitirdi.
Biraq, 4 qazaq synyby (100) , 4 orys (100) synyby qabyldandy. Iaǵni, burynǵy orys synyby oqýshylaryna 60 bala qosyp berdi. Al qazaq synybyna 60 bala qospaq túgili, burynǵy sanynan 20 bala kemitip jiberdi… Shý osy soraqy ádiletsizdikten shyǵyp otyr.
Bul tildik jáne konstitýtsiialyq diskriminatsiiaǵa ushyratatyn 100/100 teńgermeshilik “formýlasyn” kim jasady? Aty-jóni kim, qyzmeti qandai?! Maqsaty qandai - qazaq balasyn qazaq bolǵany úshin, azat bolǵany úshin, ozat bolǵany úshin shyryldatýdan basqa?!.
Bul ulttyq múddeniń, ulttyq negizdiń tamyryna balta shabar jymysqy saiasattyń maqsaty - kelesi jyly mundai qorlyqqa shydamaǵan el balalaryn orys synybyna bere bastaidy! Osy - negizgi maqsat!
Iá, bul Nazarbaev Ziiatkerlik mektepterindegi jaǵdai, baryp turǵan ádiletsizdik!
Bizde bilim salasynda ie bar ma Nazarbaev mektebine? Memlekette bul oqý ornyna eshkim jaýap bere almai ma? Ol qandai oqý orny memleket ishindegi memleket bolatyn?!! Oǵan memleketten aqsha bólinbei me sonda memleketten tys bolatyndai?!.
Nazarbaev mektebindegi narazylyq óte oryndy! Buǵan joǵarydaǵy osyǵan tikelei jaýaptylar jaýap berýi tiis qoi, qalai shydap otyr!
Óz elinde óz tilinde jaqsy oqyǵany úshin jazyqty bolatyn qai elde bar bizden basqa?!. Sol balalar ne oilady eken, qandai elde ómir súrip jatyrmyz dep qamyqqany anyq ózderinen 60 bal tómen bal alsa da oqýǵa túsip jatqan ózge tildi balalardyń aldynda.
Mynaý videodaǵy Shyńǵys Sabyr Maratuly bastaǵan, orystildilerden oq boiy ozyp tursa da, aldy 60 bal artyq alyp tursa da qazaq synybyna tapsyrǵany úshin, jalpy qazaq bolǵany úshin oqýǵa túse almai jylap turǵan 40 balanyń janaiqaiyna kim jaýap beredi? Prezident Toqaev aralasýy kerek pe buǵan da?! Premer bar, ministrler bar buǵan jaýap bere almai ma sonda eshkim?
Qazaq bolǵany úshin, ozat bolǵany úshin 40 balany jylatyp qoiyp, qalai as batyp otyr “Nazarbaev ziiatkerlik mektebi” basqarma tóraiymy K.Shámshádinova hanymǵa?!.
Ata-analardyń da ashynýy óte oryndy. Mine qazaq tildi oqýshylarǵa jasalyp jatqan tildik diskriminatsiia!
Barlyǵy da sol memlekettik til týraly zań joqtyǵynan Táýelsizdikke 30 jyldan assa da?!. Bul baryp turǵan ádiletsizdik jáne Nazarbaev mektebindegi namyssyzdyq!
Bul máselege bárimiz aralasýymyz kerek jáne ádildik ornaitynyna senemiz!
Birden qazaq tilin qoldap júrgen Oqý-aǵartý ministri Ashat Aimaǵambetovke shyǵaiyn dep oilaǵanmyn. Sóitsem, Nazarbaev mektebi Bilim ministrligi túgil memleketke de qaramaidy degendi telearna habarynan estip, aýzym ashylyp qaldy?!. Mundai masqara bola ma, memleketine mektebi qaramaityn?!.
Dál osy sátti paidalanyp, Nazarbaev dáýirinde oryn alǵan Nazarbaev mektebindegi bul ádiletsizdikti joiý kerek, memleketke qaratý kerek qaramasa. Biraq, úkimet qaýlysyna premer-ministr qol qoiyp, rettep otyrǵan, memleketten qarjy bólinip otyrǵan bul mektep qalaisha memleketke qaramaidy?!.
Úzdik bal jinap tursa da, oqýǵa túse almaǵan Qazaq balalary úshin qosymsha synyp ashý úshin kabinet joq bolyp qalady, qarjy jetpei qalady Nazarbaev mektebine? Al memleketten, iaǵni, siz ben bizdiń salyǵymyzdan quralǵan qazynadan milliardtardy alyp otyrǵan joq pa?!. Ol milliardtardy óz balalarymyzdyń igiligine qashan jumsaidy?!. Bir ai buryn Reseilik eki matematikke on kún dáris oqyǵany úshin 28 million 360 myń teńge tólep bere salǵan Atymtai-Jomarttyǵy bar Nazarbaev mektebi óz balalarymyzǵa kelgende nege tarylyp qalady?!.
Bundai memlekettik tilge diskriminatsiia bolmaý úshin elimizdegi balabaqshalardyń barlyǵy memlekettik tilde bolatyn ýaqyt jetti.
Óitkeni, orys klastaryna baratyn balalar orys tildi balabaqshalardan shyqqandar… Árine, oǵan ol balalar kináli emes, ata-analary kináli. Al ata-analary buǵan otyz jylda da Memlekettik tildi mindettei almaǵan bizdiń biliktiń kináli ekenin ashyq aityp júr qazir.
Endi mynadai qiyn jaǵdaidan shyǵý úshin ne isteý kerek?!. “Almaty qalasy himiia-biologiia baǵytyndaǵy Nazarbaev ziiatkerlik mektebiniń qazaq tiline tapsyrǵan rezervte turǵan úmitkerlerine qosymsha eki synyp (ol shamamen 50 oqýshy) ashtyrýǵa yqpal etýińizdi curaimyz”-deidi ata-analar. Óte durys, budan basqa shyǵar jol joq!
Parlamentke bizdiń atymyzǵa arnap kelgen 22 ata-ana aryzyn 2022 jyldyń 7 shildesi kúni Premer-ministr Á.Smaiylovqa, Oqý-aǵartý ministri A.Aimaǵambetovke joldadyq. Jaýabyn kútip otyrmyz, demalysta júrsek te bárin jiyp qoiyp?!.
Zańsyzdyq tez túzelýi tiis!
Ádiletsizdikke el endi tózbeidi!
Qazybek ISA, Májilis depýtaty
Ata-analar aryzy:
Memlekettik tilde tapsyrǵan oqýshylar diskriminatsiiaǵa ushyrap otyr!
Qurmetti Qazybek Isa Jarylqasynuly! Tómende qol qoiǵan ata-analar, biylǵy jylǵy Almaty qalasy himiia-biologiia baǵytyndaǵy Nazarbaev ziiatkerlik mektebine synaq tapsyrǵan balalarymyzǵa, Nazarbaev ziiatkerlik mektepteri derbes bilim berý uiymynyń “Órken” grantyn bólgen kezdegi ádiletsizdigin kórip, sizge ótinish jazýǵa májbúr bolyp otyrmyz.
2022-2023 oqý jylyna Almaty qalasy himiia-biologiia baǵytyndaǵy Nazarbaev ziiatkerlik mektebine 2178 oqýshy synaq tapsyrǵan. Onyń ishinde qazaq tiline 1483 bala - 68 paiyz, al orys tiline 695 bala - 32 paiyzdy qurap otyr. Iaǵni, qazaq tiline oqýǵa tapsyrǵandar sany eki eseden asyp tur. Eki tilde tapsyrǵan úmitkerlerdiń arasynda “Órken” grantyn iemdengenderdiń kórsetkishteri qazaq tili max: 1424 ball – min: 1186, orys tili max: 1404 ball – min: 1126 ball.
(Rezervte turǵan oqýshylardyń kórsetkishteri qazaq tili max: 1186 ball – min: 580 ball, orys tili max: 1124 ball – min: 544.)
Kórip otyrǵanyńyzdai, qazaq tiline tapsyrǵan oqýshylardyń kórsetkishteri sany jaǵynan da, bilim jaǵynan da óte joǵary.
Búkil NZM-ge qaraǵanda da balalarymyzdyń baldary joǵary deńgeide. Barlyǵy Almaty qalasyndaǵy bilimi joǵary oqýshylardyń arsynan iriktelip shyqqan daryndy balalar. Osylai bola tura, teńdei qylyp qazaq tiline 100, orys tiline 100, bar joǵy 200 “Órken” grantyn bólgen. Óz otanymyz Qazaqstanda Memlekettik tilde tapsyrǵan oqýshylar diskriminatsiiaǵa ushyrap otyr.
Qurmetti depýtat myrza sizdiń memlekettik til qazaq tiline degen janaiqaiyńyzdy, qoldaýyńyzdy, qazaq tilin damytýdaǵy úlesińizdi kórip-bilip júrmiz. Joǵaryda jazǵan jaǵdailardy eskere otyryp, Sizden qoldaý kútip otyrmyz. Elimizdiń bolashaǵy jas urpaqtyń qazaq tiline degen umtylystaryna bei-jai qaramaidy dep senemiz. Almaty qalasy himiia-biologiia baǵytyndaǵy Nazarbaev ziiatkerlik mektebiniń qazaq tiline tapsyrǵan rezervte turǵan úmitkerlerine qosymsha eki synyp (ol shamamen 50 oqýshy) ashtyrýǵa yqpal etýińizdi curaimyz.
Qurmetpen, ótinishke qol qoiýshy ata-analar.
