Bul týraly Germanıanyń qaýipsizdik organyndaǵy joǵary laýazymdy resmı tulǵaǵa súıengen The New York Times basylymy habarlady.
Basylymnyń aqparat kóziniń aıtýynsha, jaqynda ǵana komadan turǵan Navalnyı «esin tolyq jıǵan, óz jaǵdaıynan tolyq habardar».
Dúısenbi kúni Fransıa men Shvesıanyń táýelsiz zerthanalary da Navalnyıǵa «Novıchok» tobyna jatatyn qaýipti ý bergen degen býndesver mamandarynyń qorytyndysyn rastaǵan edi. Osy aqparat shyqqannan keıin birneshe saǵat ótken soń Germanıa prokýratýra ókilderi Navalnyımen kezdesken.
Navalnyıdan alynǵan taǵy bir synama úlgisi jaqyn kúnderi Hımıalyq qarýǵa tyıym salý jónindegi uıym sarapshylarynyń zerthanasynda tekseriledi.
22 tamyzda Ombydan Berlındegi «Sharıte» klınıkasyna aýystyrylǵan Navalnyıdyń qaýipsizdigi kúsheıtilgen. Onyń densaýlyǵy barǵan saıyn jaqsaryp keledi, qazir oǵan jasandy tynys alý apparatynyń kómegi qajet emes, tósekten ózdigimen turyp, júre alady. Klınıka taratqan sońǵy málimet osyndaı.
Germanıanyń qaýipsizdik organynyń ókili basylymǵa Navalnyı jazylǵannan keıin Reseıge oralatynyn aıtqan. «Ol Germanıada qalmaıdy. Úıine, Reseıge oralyp, qyzmetin jalǵastyrǵysy keledi» dedi aqparat kózi.
Ázirge reseılik saıasatker ne onyń ókili amerıkalyq basylymda jazylǵan málimetke túsinikteme bermedi.
