بەرليندەگى «شاريتە» كلينيكاسىندا ەمدەلىپ جاتقان رەسەيلىك وپپوزيسيالىق ساياساتكەر الەكسەي ناۆالنىي وزىنە «ۋ بەرۋ ءىسىن» رەسەي تارابىمەن بىرىگىپ تەرگەۋدى ۇسىنعان گەرمانيا پروكۋراتۋراسىنىڭ ۇسىنىسىنا قارسى بولعان.

بۇل تۋرالى گەرمانيانىڭ قاۋىپسىزدىك ورگانىنداعى جوعارى لاۋازىمدى رەسمي تۇلعاعا سۇيەنگەن The New York Times باسىلىمى حابارلادى.

باسىلىمنىڭ اقپارات كوزىنىڭ ايتۋىنشا، جاقىندا عانا كومادان تۇرعان ناۆالنىي «ەسىن تولىق جيعان، ءوز جاعدايىنان تولىق حاباردار».

دۇيسەنبى كۇنى فرانسيا مەن شۆەسيانىڭ تاۋەلسىز زەرتحانالارى دا ناۆالنىيعا «نوۆيچوك» توبىنا جاتاتىن ءقاۋىپتى ۋ بەرگەن دەگەن بۋندەسۆەر ماماندارىنىڭ قورىتىندىسىن راستاعان ەدى. وسى اقپارات شىققاننان كەيىن بىرنەشە ساعات وتكەن سوڭ گەرمانيا پروكۋراتۋرا وكىلدەرى ناۆالنىيمەن كەزدەسكەن.

ناۆالنىيدان الىنعان تاعى ءبىر سىناما ۇلگىسى جاقىن كۇندەرى حيميالىق قارۋعا تىيىم سالۋ جونىندەگى ۇيىم ساراپشىلارىنىڭ زەرتحاناسىندا تەكسەرىلەدى.

22 تامىزدا ومبىدان بەرليندەگى «شاريتە» كلينيكاسىنا اۋىستىرىلعان ناۆالنىيدىڭ قاۋىپسىزدىگى كۇشەيتىلگەن. ونىڭ دەنساۋلىعى بارعان سايىن جاقسارىپ كەلەدى، ءقازىر وعان جاساندى تىنىس الۋ اپپاراتىنىڭ كومەگى قاجەت ەمەس، توسەكتەن وزدىگىمەن تۇرىپ، جۇرە الادى. كلينيكا تاراتقان سوڭعى مالىمەت وسىنداي.

گەرمانيانىڭ قاۋىپسىزدىك ورگانىنىڭ وكىلى باسىلىمعا ناۆالنىي جازىلعاننان كەيىن رەسەيگە ورالاتىنىن ايتقان. «ول گەرمانيادا قالمايدى. ۇيىنە، رەسەيگە ورالىپ، قىزمەتىن جالعاستىرعىسى كەلەدى» دەدى اقپارات كوزى.

ازىرگە رەسەيلىك ساياساتكەر نە ونىڭ وكىلى امەريكالىق باسىلىمدا جازىلعان مالىمەتكە تۇسىنىكتەمە بەرمەدى.