Naýryz merekesi qarsańynda Almaty qalasynda biiktigi 12 metr, eni 12 metr bolatyn «Baqyt Báiteregi» atty simvolikalyq art-installiatsiia ornatylady, dep habarlaidy Dalanews.kz.
Bul biregei nysan qala kásipkerleriniń bastamasymen jáne qoldaýymen júzege asyrylyp, Naýryz meiramynyń basty qundylyqtary — jańarý, birlik, bereke jáne jasampazdyq ideiasyn beineleidi.
Báiterek — qazaq halqynyń dúnietanymyndaǵy ómir aǵashynyń simvoly.
Installiatsiianyń:
- tamyry — ulttyq tarih pen ata-baba murasy,
- dińi — elimizdiń turaqtylyǵy men damýy,
- butaqtary — bolashaqqa umtylǵan jas urpaq,
- japyraqtary — halyqtyń baqyty men ál-aýqaty.
Aǵashtyń joǵarǵy bóliginde ornalasqan shańyraq elementteri Qazaqstan halqynyń birligin, ortaq úi men tatýlyqty bildiredi. Bul kompozitsiia elimizdiń basty bailyǵy — qoǵamdyq kelisim men beibit ómirdiń kórkem beinesi bolyp tabylady.
«Baqyt Báiteregi» — bul tek merekelik installiatsiia emes, ol Naýryz merekesiniń rýhyn jetkizetin, qala turǵyndary men qonaqtaryna jaqsy kóńil-kúi syilaityn art -nysan.
