Grýzıanyń eks-prezıdenti Mıhaıl Saakashvılı 2022 jyldan beri jatqyzylǵan Tbılısıdegi klınıkadan shyǵarylyp, qaıtadan «12-nómirli túzetý mekemesine» (Rýstavı túrmesine) jetkizildi, dep habarlaıdy Dalanews.kz.
Ol jazasyn jalpy tártippen osy jerde jalǵastyrady. Bul týraly 12 qarasha, sársenbi kúni Grýzıanyń Arnaıy penıtensıarlyq qyzmeti Facebook paraqshasynda habarlady.
Jazbada Saakashvılıdiń qazirgi densaýlyq jaǵdaıy «qanaǵattanarlyq» dep kórsetilgen, sondyqtan oǵan stasıonarda emdelý «qajet emes» delinedi. Sonymen qatar, penıtensıarlyq qyzmet saıasatkerdiń jeke dárigeriniń sheshimine silteme jasaǵan.
Saakashvılıge qatysty qylmystyq ister
Eks-prezıdent 2021 jyldyń 29 qyrkúıegine qaraǵan túni Grýzıaǵa qaıtyp oralǵan. Tergeý málimetinshe, ol Grýzıanyń Potı portyna «Vılnús» kemesimen jasyryn kelip, júk kóliginiń ishine tyǵylǵan. Saakashvılı 2 qazandaǵy saılaýda bıleýshi «Grýzın armany» partıasyna qarsy daýys berýge shaqyryp, Facebook-ke vıdeo jarıalaǵan. Keıingi vıdeosynda halyqty narazylyqqa shyǵýǵa úndep, saılaý falsıfıkasıalary bolýy múmkin ekenin aıtqan. Polısıa men arnaıy qyzmetter 1 qazanda onyń qaıda ekenin anyqtap, Tbılısıdegi júk kóliginiń júrgizýshisiniń páterinen ustap, qamaýǵa alǵan.
2021 jyldyń qazanynda Saakashvılı túrmede ashtyq jarıalap, ony 50 kún ustady. Ol ashtyǵyn tek Gorı qalasyndaǵy áskerı gospıtálǵa reabılıtasıa úshin aýystyrylǵannan keıin toqtatty. Alaıda 2022 jyldyń 21 aqpanynda túrmege qaıta oralǵan soń taǵy da ashtyq jarıalady. Bul joly 20 kúnge sozyldy. 12 mamyrda jaǵdaıy nasharlaǵan soń ol túrmeden Tbılısıdegi «Vıvamedı» jeke klınıkasyna aýystyryldy. Ol jerde jeke palatada kúzetpen jatty. 2023 jyldyń 31 qańtarynda Ýkraına Joǵarǵy Radasynyń depýtaty Elızaveta Iasko Saakashvılıdiń jaǵdaıy tym aýyrlap, reanımasıaǵa tústi dep málimdedi. Alaıda klınıka bul aqparatty joqqa shyǵardy.
Qazir Saakashvılı depýtat Valerıı Gelashvılıdi soqqyǵa jyqqany jáne bank qyzmetkeri Sandro Gırgvlıanıdiń ókilderin keshirimmen bosatýy isi boıynsha alty jyldyq jazasyn ótep jatyr. 2025 jyldyń 12 naýryzynda Tbılısı qalalyq soty ony búdjetten 9 mln larıdi (shamamen 3 mln eýro) ysyrap etý isi boıynsha taǵy toǵyz jylǵa sottady. 17 naýryzda sol sot oǵan memlekettik shekarany zańsyz kesip ótkeni úshin qosymsha 4,5 jyl jaza qosty. Jazalardy ishinara biriktirgennen keıin saıasatkerdiń jalpy túrme merzimi 12 jyl 6 aıǵa jetti.
