Memleket jáne qoǵam qairatkeri, Qazaqstan Ulttyq ǵylym akademiiasynyń akademigi Myrzatai Joldasbekov elordanyń qalyptasý kezeńi týraly esteligin bólisti, dep habarlaidy dalanews.kz.
Ǵalymnyń aitýynsha, ol 2000 jyly arnaiy shaqyrtýmen Astanaǵa qonys aýdarǵan. Sodan beri qala qurylysynyń qalai qarqyn alyp, elordanyń úlken megapoliske ainalǵanyna kýá bolǵan.
Myrzatai Joldasbekov bul týraly Astana qalasy ákimdiginiń "Rýhaniiat" kommýnaldyq memlekettik mekemesine bergen suhbatynda aitty.
Akademik elordanyń alǵashqy jyldarynda sol jaǵalaýda qurylys ataýlynyń az bolǵanyn eske aldy. Onyń sózinshe, sol kezeńde Nursultan Nazarbaev memleket jáne qoǵam qairatkerlerin jinap, bolashaq Astananyń damý josparyn tanystyrǵan.
"Sol jaǵalaýda túk joq, jylan jalaǵandai edi. Sol jerde turyp, Nurekeń "anaý bolady, mynaý bolady" dep bárin jyrdai qylyp aitty. Ishimnen "munyń bárin kim isteidi, qashan bolady?" dep oiladym. Al qazir qarasań, qala ósip barady", – dedi ol.
Myrzatai Joldasbekov Astananyń qazirgi kelbetin úlken eńbektiń nátijesi dep baǵalady.
"Buǵan deiin tas úi salǵandy kórdik, zaýyt salǵandy kórdik. Biraq qala salǵandy, onyń ishinde Astana salǵandy kórgenimiz joq. Sol jaǵalaýda qazir kúni-túni adam kóp. Jastardyń júrgen jeri – oiyn-kúlki, toi. Bul – jaqsylyqtyń belgisi", – dedi akademik.
Ol shirek ǵasyrǵa jýyq ýaqyt ishinde elordanyń adam tanymastai ózgerip, eldiń saiasi ári qoǵamdyq ómiriniń basty ortalyqtarynyń birine ainalǵanyn atap ótti.
