Qazaqstannyń Sport ministrligi el aimaqtaryndaǵy sport infraqurylymynyń naqty ahýalyn anyqtaý úshin arnaiy zertteý júrgizýdi josparlap otyr. Bul jumysqa biýdjetten 51,7 mln teńge bólinbek, dep habarlaidy Dalanews.kz.
Vedomstvo osy qarjyǵa qalalar men aýyldardaǵy sport nysandarynyń qanshalyqty jetkilikti ekenin, olardyń tehnikalyq jaǵdaiyn jáne halyqqa qoljetimdiligin bilgisi keledi. Zertteý barysynda sport zaldary, alańdar men ózge de nysandardyń bar-joǵy jáne qazirgi kúii saralanady.
Sonymen qatar, mamandar turǵyndardyń mundai oryndarǵa jaiaý baryp-kele alý múmkindigin, sondai-aq ondaǵy qyzmet baǵasynyń halyq qaltasyna sai keletin-kelmeitinin anyqtaýy tiis. Iaǵni másele tek ǵimarat sany emes, ony halyqtyń paidalana alý deńgeiine de qatysty bolmaq.
Tapsyrysty oryndaityn merdiger óńirlerdegi túitkildi máselelerdi kórsetip, olardy sheshý joldary boiynsha naqty usynystar berýi kerek.
Jalpy alǵanda, bul – oryndy bastama ári biýdjet qarjysyn tiimdi jumsaýdyń bir joly. Alaida qoǵam mundai zertteýlerdiń qorytyndysyn da kórýi tiis degen pikir bar. Sebebi memleket túrli saraptamalar men taldaýlarǵa jii qarjy bóledi, biraq olardyń nátijesi kóp jaǵdaida jurtshylyqqa tolyq jetpeidi nemese múlde jariialanbai qalady.
Sarapshylardyń aitýynsha, oń bolsyn, teris bolsyn, biýdjet esebinen jasalǵan kez kelgen analitikalyq material qazaqstandyqtarǵa ashyq qoljetimdi bolýy qajet.
