Qazaqstanda ýtilizatsiia alymyn tómendetý máselesi kún tártibinde turmaǵanyn QR Ónerkásip jáne qurylys ministrliginiń baspasóz qyzmeti málimdedi, – dep habarlaidy Dalanews.kz.
– Qazir alym mólsherin arzandatý qarastyrylyp jatqan joq. Sheteldik avtokólikterdi tirkeý kezinde alynatyn tólem boiynsha tiisti sharalar tehnikalyq reglament talaptaryna sai kelmeitin kólik quraldaryn ákelýdi shekteý úshin ǵana emes, otandyq avtoóndiristi damytýǵa qarjy jiberý maqsatynda engizildi, – degen ministrlik Astanadaǵy ýtilizatsiia alymyna qarsy adamdarmen kezdesý qorytyndysy jónindegi habarlamasynda.
Ministrlik alym boiynsha qabyldanǵan sharalar otandyq avtokólik óndirisi men qaldyqtardy basqarý jónindegi ishki infraqurylymda básekeni jaqsartýdy kózdeidi deidi.
– Atalǵan máselelerge tiisti memlekettik organdardy tarta otyryp, barlyq kerek qujatty kórsetip sheshý kerek, – degen ministrlik.
4 naýryzda túrli óńirden jinalǵan bir top adam ýtilizatsiia alymyn joiýdy talap etip Astanaǵa barǵanyn habarlady. Narazy top Ónerkásip jáne qurylys ministrligi ókilderimen kezdesýge, olarǵa óz usynystaryn aityp, alǵashqy tirkeý kezindegi tólem jáne ýtilizatsiia alymyn joiý talabyn jetkizýge nietti ekenin málimdedi.
Olardyń sózinshe, 2016 jyly Qazaqstanda alǵashqy tirkeý kezindegi tólem engizilgen soń kólikterdiń ortasha paidalaný merzimi 20 jyldan 24 jylǵa deiin ósken.
2024 jyldyń basynan beri Qazaqstannyń birneshe óńirinde ýtilizatsiia alymyn arzandatýdy talap etkender prezident Qasym-Jomart Toqaevqa úndeý jasady.
Aqpan aiynda Oral qalasynda shamamen 70 adam halyqqa qyzmet kórsetý ortalyǵy mańyna jinalyp, ýtilizatsiia alymyn 200 myń teńgege deiin azaitýdy talap etti. Oǵan deiin Aqtóbede úsh júzdei adam shetelden ákelingen kólikterdiń alǵashqy tirkeýine tólenetin aqsha mólsherin jáne ýtilizatsiia alymyn azaitýdy talap etip, biliktiń kelisimi boiynsha miting ótkizdi.
2015 jyly Qazaqstanda jańadan qurylǵan "Operator ROP" kompaniiasy jaramsyz kólikterdiń bólshekteri men maiyn óńdegeni úshin ustalatyn ýtilizatsiia alymynan paida tapqan. BAQ pen belsendiler bul kompaniiaǵa eks-prezident Nursultan Nazarbaevtyń qyzy Áliia Nazarbaevanyń qatysy bar dep aitqan. 2020 jyldyń basyndaǵy derek boiynsha, úsh jylda "Operator ROP" JShS shotyna 220 milliard teńge túsken. Qańtar oqiǵasynan keiin prezident Toqaev "Operator ROP" kompaniiasynyń jumysyn toqtatýdy buiyrdy. Artynsha onyń atqaryp kelgen mindeti "Jasyl damý" kompaniiasyna ótti.
2022 jyly belsendilerdiń kóptegen narazylyq aktsiiasynan keiin bilik ýtilizatsiia alymyn eki ese azaitqan, biraq narazylar ol sheshimdi synaǵan. Belsendiler ýtilizatsiia alymynyń mólsheri áli joǵary jáne ony jinaý mehanizminde ashyqtyq joq deidi.
2023 jyly Astana soty "Operator ROP" kompaniiasynyń burynǵy basshylary men burynǵy ekologiia ministriniń orynbasaryn 7 jylǵa deiingi merzimge bostandyǵynan aiyrýǵa úkim shyǵarǵan.
Bes jyl ishinde "Operator ROP" 700 mlrd teńge (1,5 mlrd dollar) jinaǵan.
