Eýrazıalyq ekonomıkalyq odaq naryǵynda qazaqstandyq taýarlardyń eksportyna kedergi keltirip turǵan 70-ke tarta shekteý bar. Mundaı málimetti elordada ótken Saýda jáne ıntegrasıa mınıstrliginiń keńeıtilgen otyrysynda Premer-Mınıstrdiń birinshi orynbasary – Qarjy mınıstri Álıhan Smaıylov aıtty, – dep habarlaıdy QazAqparat.

– Buǵan deıin aıtylǵandaı, memlekettiń qoldaýyna qaramastan shıkizattyq emes eksporttyń ósimi óte baıaý. Bul rette, EAEO aıasyndaǵy ıntegrasıa týraly aıtyp ótkim keledi. Ókinishke qaraı, otandyq taýarlar bizdiń seriktes-memleketterdiń naryǵynda kedergilermen betpe-bet kelip otyr. Búgingi tańda dál mundaı 70-ke tarta kedergi men shekteý bar. Bul máseleni barlyq alań men deńgeıde, EAEO keńesinde de, Memleket basshylarynyń deńgeıinde de kóterip kelemiz. Biraq, ókinishke qaraı, bul kedergiler áli de saqtalyp otyr. Keıbir salada alǵa jyljý bar desek te, kedergilerdiń birazy boıynsha naqty bir sheshimniń qabyldanǵaly otyrǵanyn kórmeı otyrmyz, – dedi Álıhan Smaıylov.

Birinshi vıse-premerdiń aıtýynsha, otandyq bıznestiń múddesin qorǵaý úshin ımporttyq taýarlarǵa qatysty «aına sıpatyndaǵy qorǵaý sharasyn» qolǵa alý kerek.

– Meniń oıymsha, osy sharany qolǵa alsaq, ádilettilikke jeter edik. Máselen, naqty sandarmen sóıleıtin bolsaq, Qazaqstannyń EAEO elderimen ózara saýda-sattyǵynda 30 paıyzdyq eksport pen 70 paıyzdyq ımportqa ıe bolyp otyrmyz. Iaǵnı, saıyp kelgende biz seriktesterimizden qaraǵanda ishki naryqty ashý ıntegrasıasy jaǵynan alǵa jyljyp kettik. Sol sebepti, menińshe, «aına sıpatyndaǵy sharalarǵa» qatysty oılanatyn kez jetti. Baqyt Sultanovtan bul turǵyda naqty usynys kútemin, – dedi Álıhan Smaıylov.