ەۋرازيالىق ەكونوميكالىق وداق نارىعىندا قازاقستاندىق تاۋارلاردىڭ ەكسپورتىنا كەدەرگى كەلتىرىپ تۇرعان 70-كە تارتا شەكتەۋ بار. مۇنداي مالىمەتتى ەلوردادا وتكەن ساۋدا جانە ينتەگراسيا مينيسترلىگىنىڭ كەڭەيتىلگەن وتىرىسىندا پرەمەر-مينيستردىڭ ءبىرىنشى ورىنباسارى – قارجى ءمينيسترى ءاليحان سمايىلوۆ ايتتى، – دەپ حابارلايدى قازاقپارات.
– بۇعان دەيىن ايتىلعانداي، مەملەكەتتىڭ قولداۋىنا قاراماستان شيكىزاتتىق ەمەس ەكسپورتتىڭ ءوسىمى وتە باياۋ. بۇل رەتتە، ەاەو اياسىنداعى ينتەگراسيا تۋرالى ايتىپ وتكىم كەلەدى. وكىنىشكە قاراي، وتاندىق تاۋارلار ءبىزدىڭ سەرىكتەس-مەملەكەتتەردىڭ نارىعىندا كەدەرگىلەرمەن بەتپە-بەت كەلىپ وتىر. بۇگىنگى تاڭدا ءدال مۇنداي 70-كە تارتا كەدەرگى مەن شەكتەۋ بار. بۇل ماسەلەنى بارلىق الاڭ مەن دەڭگەيدە، ەاەو كەڭەسىندە دە، مەملەكەت باسشىلارىنىڭ دەڭگەيىندە دە كوتەرىپ كەلەمىز. ءبىراق، وكىنىشكە قاراي، بۇل كەدەرگىلەر ءالى دە ساقتالىپ وتىر. كەيبىر سالادا العا جىلجۋ بار دەسەك تە، كەدەرگىلەردىڭ ءبىرازى بويىنشا ناقتى ءبىر شەشىمنىڭ قابىلدانعالى وتىرعانىن كورمەي وتىرمىز، – دەدى ءاليحان سمايىلوۆ.
ءبىرىنشى ۆيسە-پرەمەردىڭ ايتۋىنشا، وتاندىق بيزنەستىڭ مۇددەسىن قورعاۋ ءۇشىن يمپورتتىق تاۋارلارعا قاتىستى «اينا سيپاتىنداعى قورعاۋ شاراسىن» قولعا الۋ كەرەك.
– مەنىڭ ويىمشا، وسى شارانى قولعا الساق، ادىلەتتىلىككە جەتەر ەدىك. ماسەلەن، ناقتى ساندارمەن سويلەيتىن بولساق، قازاقستاننىڭ ەاەو ەلدەرىمەن ءوزارا ساۋدا-ساتتىعىندا 30 پايىزدىق ەكسپورت پەن 70 پايىزدىق يمپورتقا يە بولىپ وتىرمىز. ياعني، سايىپ كەلگەندە ءبىز سەرىكتەستەرىمىزدەن قاراعاندا ىشكى نارىقتى اشۋ ينتەگراسياسى جاعىنان العا جىلجىپ كەتتىك. سول سەبەپتى، مەنىڭشە، «اينا سيپاتىنداعى شارالارعا» قاتىستى ويلاناتىن كەز جەتتى. باقىت سۇلتانوۆتان بۇل تۇرعىدا ناقتى ۇسىنىس كۇتەمىن، – دەدى ءاليحان سمايىلوۆ.
