Qaraǵandy oblysynda iri esirtki zerthanasy joiyldy, dep habarlaidy Dalanews.kz.
Shahtinsk qalasyna qarasty Severo-Zapadnyi kentiniń aýmaǵynda ornalasqan jasyryn zerthananyń qyzmeti toqtatyldy. Onda sintetikalyq esirtki óndirilgen.
Zańsyz ainalymnan 6 tonnaǵa jýyq prekýrsor men 35 keli daiyn psihotrop zat tárkilendi. Bul - 1 millionnan asa dozaǵa teń, iaǵni osy mólsherde ýly zat qara naryqqa shyǵarylýy múmkin edi.
Operatsiia barysynda Shahtinsk qalasynyń 27 jáne 29 jastaǵy eki turǵyny ustaldy. Tintý kezinde olardyń turǵylyqty jerinen 355 kanistr himiialyq zat, ondaǵan zerthanalyq qurylǵylar (sorǵysh júieler, indýktsiialyq plitalar, respiratorlar jáne arnaiy tehnikalar), sondai-aq, qylmystyq maqsatta paidalanylǵan dep boljanǵan úsh kólik tárkilendi.
"Bul - óńirde anyqtalǵan eń iri esirtki zerthanalarynyń biri. Myńdaǵan adamnyń ómiri men densaýlyǵyna tóngen qaýiptiń joly kesildi", - dep málimdedi Qaraǵandy oblystyq politsiia departamentiniń bastyǵy Negmet Ysmaǵulov.
Qazirgi tańda kúdiktiler ýaqytsha ustaý izoliatoryna qamaldy. Qylmystyq is qozǵalyp, tergeý amaldary júrgizilip jatyr.
