Senat tóraǵasy Máýlen Áshimbaev “QazAvtoJol” men “Jasyl Damý” kompaniialaryna túsetin milliardtaǵan qarajattyń ashyqtyǵy men baqylaý tetikterine qatysty másele kóterdi. Aitýynsha, atalǵan uiymdardyń esep júrgizý júiesi túsiniksiz. Mundai olqylyqtar qarajattyń tiimsiz jumsalýyna jáne qoǵam senimine keri áser etýi múmkin ekenin jetkizdi, dep habarlaidy Dalanews.kz.
Áshimbaevtyń dereginshe, bul kompaniialarǵa jyl saiyn qomaqty qarajat túsedi. Soǵan qaramastan, memleket biýdjetten qosymsha qarjy bólýin jalǵastyryp keledi.
“Aitylǵan málimetterge qarasaq, “QazAvtoJol” keiingi eki jylda 130 milliard teńge jinaǵan. Biylǵy jyl áli aiaqtalmady. Sondai-aq “Jasyl Damý” aktsionerlik qoǵamy da jumys istep tur. Osy aiaqtalmaǵan jyl ishinde olardyń shotyna 600 milliard teńge túsken. Bul - óte úlken rezerv”, - dedi Áshimbaev.
Osy tusta, tóraǵa óńirlerdegi jaǵdailardy eske saldy.
“Biz qazir óńirlerge 1 milliard, kei jerde 500 million teńge qajet dep izdep júrmiz. Al osy eki kompaniiaǵa kelsek, memleket olarǵa biýdjetten qarjy bólip keledi. Tipti 2026 jylǵa arnalǵan biýdjetke de qosymsha qarajat engizilgen. Munda basqa kompaniialardy ázirge qozǵamai-aq qoiaiyq”, — dedi ol.
Áshimbaevtyń aitýynsha, negizgi másele qarjynyń bólinýinde emes, onyń baqylaýynda.
“Osy jerde zańdy suraq týady: nege biz bul kompaniialarǵa qosymsha qarajat bólemiz? Másele tek bólýde emes, osy qarjynyń baqylaýynda. Óitkeni bul qarajat Biryńǵai qazynashylyq shotyn ainalyp ótedi. Iaǵni oǵan parlamenttik jáne qarjylyq baqylaý álsiz. Biýdjettik qarajatty paidalaný kezinde saqtalýy tiis rásimder de bul jaǵdaida oryndalmaidy. Demek, baqylaý álsireidi jáne bul qarajattyń tiimdi igerilýine qatysty suraqtar týyndaidy”, - dep túiindedi Áshimbaev.
