سەنات ءتوراعاسى ماۋلەن اشىمبايەۆ “قازاۆتوجول” مەن “جاسىل دامۋ” كومپانيالارىنا تۇسەتىن ميللياردتاعان قاراجاتتىڭ اشىقتىعى مەن باقىلاۋ تەتىكتەرىنە قاتىستى ماسەلە كوتەردى. ايتۋىنشا، اتالعان ۇيىمداردىڭ ەسەپ جۇرگىزۋ جۇيەسى تۇسىنىكسىز. مۇنداي ولقىلىقتار قاراجاتتىڭ ءتيىمسىز جۇمسالۋىنا جانە قوعام سەنىمىنە كەرى اسەر ەتۋى مۇمكىن ەكەنىن جەتكىزدى، دەپ حابارلايدى Dalanews.kz.
اشىمبايەۆتىڭ دەرەگىنشە، بۇل كومپانيالارعا جىل سايىن قوماقتى قاراجات تۇسەدى. سوعان قاراماستان، مەملەكەت بيۋدجەتتەن قوسىمشا قارجى ءبولۋىن جالعاستىرىپ كەلەدى.
“ايتىلعان مالىمەتتەرگە قاراساق، “قازاۆتوجول” كەيىنگى ەكى جىلدا 130 ميلليارد تەڭگە جيناعان. بيىلعى جىل ءالى اياقتالمادى. سونداي-اق “جاسىل دامۋ” اكسيونەرلىك قوعامى دا جۇمىس ىستەپ تۇر. وسى اياقتالماعان جىل ىشىندە ولاردىڭ شوتىنا 600 ميلليارد تەڭگە ءتۇسكەن. بۇل - وتە ۇلكەن رەزەرۆ”، - دەدى اشىمبايەۆ.
وسى تۇستا، ءتوراعا وڭىرلەردەگى جاعدايلاردى ەسكە سالدى.
“ءبىز ءقازىر وڭىرلەرگە 1 ميلليارد، كەي جەردە 500 ميلليون تەڭگە قاجەت دەپ ىزدەپ ءجۇرمىز. ال وسى ەكى كومپانياعا كەلسەك، مەملەكەت ولارعا بيۋدجەتتەن قارجى ءبولىپ كەلەدى. ءتىپتى 2026 جىلعا ارنالعان بيۋدجەتكە دە قوسىمشا قاراجات ەنگىزىلگەن. مۇندا باسقا كومپانيالاردى ازىرگە قوزعاماي-اق قويايىق”، — دەدى ول.
اشىمبايەۆتىڭ ايتۋىنشا، نەگىزگى ماسەلە قارجىنىڭ بولىنۋىندە ەمەس، ونىڭ باقىلاۋىندا.
“وسى جەردە زاڭدى سۇراق تۋادى: نەگە ءبىز بۇل كومپانيالارعا قوسىمشا قاراجات بولەمىز؟ ماسەلە تەك بولۋدە ەمەس، وسى قارجىنىڭ باقىلاۋىندا. ويتكەنى بۇل قاراجات ءبىرىڭعاي قازىناشىلىق شوتىن اينالىپ وتەدى. ياعني وعان پارلامەنتتىك جانە قارجىلىق باقىلاۋ ءالسىز. بيۋدجەتتىك قاراجاتتى پايدالانۋ كەزىندە ساقتالۋى ءتيىس راسىمدەر دە بۇل جاعدايدا ورىندالمايدى. دەمەك، باقىلاۋ السىرەيدى جانە بۇل قاراجاتتىڭ ءتيىمدى يگەرىلۋىنە قاتىستى سۇراقتار تۋىندايدى”، - دەپ تۇيىندەدى اشىمبايەۆ.
