Atyraý oblysy ákiminiń orynbasary men óńirde únemi tender jeńip júrgen kompaniia arasynda qandai da bir bailanys bolýy múmkin ekeni týraly aqparat tarady. Antikor osy máselege nazar aýdardy, dep habarlaidy Dalanews.kz.
Atyraýda sheneýniktiń basy daýǵa qaldy
Za nami ýje vyehali arnasy málimetinshe, Atyraý oblysy ákiminiń orynbasary Qairat Nurtaev bul qyzmetke kelmei turyp, "BatysAliansStroi" JShS-niń bas direktory bolǵan.
"Kezdeisoqtyq pa, joq pa, bul kompaniia uzaq ýaqyttan beri jergilikti atqarýshy organdar jariialaǵan tenderlerdi utyp keledi. EGOV.PRESS arnasynyń jazýynsha, bul kompaniianyń Májilis depýtaty Ádil Jubanovpen de bailanysy bar", - dep jazylǵan arna dereginde.
Osy jaittarǵa bailanysty Antikor "BatysAliansStroi" JShS-niń memlekettik satyp alýǵa qatysýy qanshalyq zańdy ekeni týraly saýalǵa jaýap bergen.
"Sybailas jemqorlyqqa qarsy qyzmet "bul kompaniianyń memlekettik satyp alýǵa qatysýyndaǵy zańbuzýshylyqtar" týraly buǵan deiin áleýmettik jelilerde jariialanǵan aqparat tirkelgenin rastady. Qazir bul másele boiynsha Antikor men memlekettik ishki aýdit qyzmetiniń qyzmetkerleri tekseris júrgizip jatyr. QR Qylmystyq-protsestik kodeksiniń 181-baby 5-tarmaǵyna sáikes tekseris materialdary Atyraý oblysy boiynsha ishki memlekettik aýdit departamentine joldanǵan. Sonymen qatar, Atyraý oblysy boiynsha Sybailas jemqorlyqqa qarsy departament laýazymdy tulǵalar men "BatysAliansStroi" JShS arasyndaǵy múddeler qaqtyǵysy bar-joǵyn qarastyryp jatyr", - dep jazylǵan arna dereginde.
Qairat Nurtaev kim?
Dalanews.kz ákimdiktiń resmi saityndaǵy aqparattarǵa sholý jasady. Rasynda da, Qairat Nurtaev bul orynǵa kelgenge deiin túrli laýazymdy qyzmet atqarǵan. Sonyń ishinde:
- 2021 jyldyń sáýirinen 2022 jyldyń qańtaryna deiin Atyraý oblysy ákiminiń keńesshisi;
- 2022 jyldyń qańtarynan tamyzǵa deiin "BatysAliansstroi" JShS bas direktory bolǵan.
Al 2022 jyldyń tamyzynan bastap Atyraý oblysy ákiminiń orynbasary laýazymyn atqaryp keledi.
Buǵan deiin qandai aqparat tarady?
Aita keteiik, buǵan deiin de Telegram arnalarda osyndai aqparat tarady.
"AMANAT partiiasynan QR Parlamenti Májilisiniń depýtaty Ádil Jubanovtyń "BatysAliansStroi" JShS kompaniiasy jyl saiyn halyq qarajaty esebinen Atyraý oblysy ákimdiginen milliardtaǵan tender utyp alady. Memlekettik satyp alý saitynda 2016 jyldan bastap jasalǵan 140 kelisimshart kórsetilgen. Bir tańǵalarlyǵy, oblys ákiminiń qazirgi orynbasary Qairat Nurtaev buryn osy kompaniiada bas direktor qyzmetin atqarǵan. Bul jait kóp nárseni túsindiredi", - dep jazdy buǵan deiin arnalardyń biri.
