«Olardyń qatary baiaǵysha. Buǵan prezident otbasyn, onyń ishinde Dariǵa Nazarbaeva men Timýr Qulybaevty, UQK basshysynyń orynbasary, Nazarbaevtyń nemere inisi Samat Ábishti jáne eski gvardiia sapyndaǵy taǵy birneshe tanymal tulǵany qosar edim. Tasmaǵambetov? Ol Kishi júzdiń balasy. Uly júz ben Orta júzdiń ókilderi bul sheshimdi qoldai qoiýy neǵaibyl», — degen Sátpaev
[audio mp3="https://dalanews.kz/wp-content/uploads/2017/03/2017_01_27_satpaevrus_wocvy1ef.v05.mp3"][/audio]
(dybys jazba: sputniknews.kz)
Sátbaevtyń deńgeiindegi saiasattanýshy osylai dese, ózgesine ne joryq?
Jalǵyz Sátpaev emes, osyǵan uqsas pikirdi talai aýzy dýaly sarapshynyń aýzynan estigenbiz. Birin-biri qaitalaidy. Biriniń aýzyna biri túkirip qoiǵandai sóileidi. Dál osylai bolatyndai kósiledi. Bálkim, bir bilgeni bar shyǵar, kim bilgen...
Sonda deimiz de, murager týraly áńgimeni kim shyǵaryp júr? Úkimet pe? Álde Aq Ordanyń ózi me? Bálkim, taqtan úmitti muragerdiń bireýi bolar? Bilsek, Nazarbaevtyń ózi bul týraly lám dep, aýyzyn ashqan emes.
Joq, ózimiz. Murager týraly áńgimeni de oilap tapqan ózimiz. Endi ony ózimiz jyr júrmiz. Osy arqyly bilikke oi salyp otyrǵanymyzdy ańǵarmaimyz, anyǵynda. Júieniń yǵyna jyǵylyp jatqanymyzdy kórgimiz kelmeidi.
«E, buqaranyń ózi osyǵan yqylasty eken. Halyqtyń sózinen asyp qaida baramyz?» dep, oilaýy múmkin ǵoi, bizdiń biliktiń. Solai oilaidy da…
Qazaqstannyń demokratiialyq memleket ekeni ótirik bolǵany ma sonda? Aitalyq, Ata Zańnan attap ketýge bola ma?
Prezidenttiń demokratiialyq jolmen sailanatyny qaida?
Joq, biz ańǵal da, ańqaý da emespiz. «Qazaqstanda demokratiia bar ma?» — degen saýalǵa berer óz jaýabymyz bar. Belgileri bar, nyshandary bar. Biraq, sonyń ózin qurtyp, joq qylyp jibermekpiz.
Murager emes, úmitker shyǵar...
«Taqty tapsyrý, bilikti amanattaý» degen túsinikterdi sanaǵa ózimiz sińdirip, ony qalypty qubylys retinde qabyldaityn jaǵdaiǵa jetken siiaqtymyz.
Bizdi qoishy. El álgi Sátpaevtardyń sózin tyńdaidy, negizinde. Álbette, onyń deńgeiindegi sarapshylar halyqty tárbielei almasa da, pikirine qulaq túrgize alatyn álýetke ie.
Endeshe, dál osy Sátpaevtar: «Prezident demokratiialyq jolmen sailanýy tiis qoi. Úmitkerlerdiń arasynan bálenbaidy, túgenbaidy atap aitar edim. Sailaýda anaý bir úmitkerdyń baǵy janady-aý» dese, bolmai ma?
Bolsyn, bolmasyn dál osylai aitsa, bálkim, bilik te oilanar ma edi. Bul arada kórshi Ózbekstan bizge úlgi bolmaýy tiis. Ózbekstannyń jaǵdaiynda ne ózgerdi, aityńyzshy? Eshteńe de...
Anyǵy, muragerdi halyq tańdamaidy. Júie tańdaidy.
Sosyn murager týraly áńgime Reseige tiimdi. Sobianin degen bar. Saiasattanýshy. Sonyń suhbatyn oqydyq.
«Nazarbaev bilikti tapsyrýǵa bolatyn birneshe stsenariidi oilastyryp júrgeni anyq. Munyń biri – bilikti týysqanyna ótkizý jáne eń bastysy, óziniń saiasi baǵdaryn saqtai alatyn ainalasyndaǵy senimdi jaqtasyna tapsyrý», — depti.
Bul aradaǵy saiasi baǵdardyń astaryna Sobianin Kremldi de kirgizip otyr. Demek, murager týraly áńgime teriskei kórshimizdiń tapsyrmasymen aitylyp jatýy ábden múmkin. Solai.
Murager emes, úmitker. Taqty tapsyrý emes, ádil sailaý. Bulardyń qanshalyqty júzege asatyny mańyzdy emes, biraq bizdiń aýzymyzdan osyndai sóz shyǵýǵa tiisti.
Dýman BYQAI
