Aqtaý qalasynan Munaıly aýdanyna qatynaıtyn jolaýshylar avtobýstary jańartylady, – dep habarlaıdy Dalanews.kz Mańǵystaý oblysy ákiminiń baspasóz qyzmetine silteme jasap.

2021 jyldyń sońyna deıin №105 «Aqtaý-Basqudyq-Mańǵystaý» baǵytyndaǵy tasymaldaýshy óz qarajaty esebinen DAEWOO BC211 markaly zamanaýı 10 jańa avtobýs satyp alady.

Oblysta jolaýshylardy tasymaldaý 35 turaqty marshrýt, 200-ge jýyq avtobýspen júzege asyrylýda. Qoǵamdyq kólikterdiń 40% astamynyń tozyǵy jetken.

Jolaýshylardy yńǵaıly ári sapaly avtobýstarmen qamtý maqsatynda byltyrdan beri birqatar sharalar qolǵa alynýda. Atap aıtqanda, ótken jyly Aqtaý qalasynyń avtoparki 18 jańa avtobýspen jańardy. Bıyl jolaýshylar tasymaldaýshysynyń bastamasymen Aqtaý qalasyna 2019 jylǵy shyqqan «Ankai» markaly 30 jańa kólik satyp alyndy. Osylaısha oblys ortalyǵynyń avtobýs parki 70%-ǵa jańartyldy.