Premer-ministr Oljas Bektenovtiń tóraǵalyǵymen ótken Úkimet otyrysynda himiia jáne munai-himiia salasyn damytý máselesi qaraldy, - dep habarlaidy Dalanews.kz.
Búgingi tańda elimizde himiia jáne munai-gaz himiiasy sektorynda 12 iri kásiporyn jumys isteidi. Óndirister mineraldy tyńaitqyshtar, beiorganikalyq jáne organikalyq himiialyq zattarmen qatar aýqymdy ónim spektrin shyǵarady. Mysaly Atyraý oblysynda jumys istep turǵan polipropilen zaýyty – Ortalyq Aziia óńirindegi osy baǵyttaǵy eń iri kásiporyn jáne Qazaqstan óńdeý ónerkásibiniń eń aýqymdy jobasy. 2024 jyly jobanyń II kezeńiniń qurylysy bastaldy. Negizgi mindet – importtyq ónimderdi tolyq almastyryp, qosylǵan quny joǵary eksporttyń ósýin qamtamasyz etý. Jobanyń jalpy el ekonomikasyna tigizetin mýltiplikativti áseri zor.
Sonymen qatar, Jambyl oblysynda natrii tsianidi men ammonii sýlfaty óndirisin keńeitý kózdelip otyr. Budan bólek býtadien, karbamid, polietilentereftalat óndirisi boiynsha perspektivaly jobalar iske asyrylyp jatyr.
Úkimet otyrysynda premer-ministr óńdeý tereńdigin arttyrý jáne joǵary tehnologiialyq ónim túrlerin keńeitý qajettigin atap ótti.
"Bul jobalardyń barlyǵy qosylǵan qun tizbegin qurýǵa úlken úles qosady. Degenmen shikizatty tereń óńdeý baǵytynda salanyń áleýeti tolyq paidalanylmai otyr. Kúrdeli ónim shyǵarý kólemi áli de tómen. Shikizat resýrstary men munai baǵasy qubylyp turǵan qazirgi jaǵdaida óńdeý kólemin ulǵaityp, daiyn ónimmen syrtqy naryqtarǵa shyǵý kerek. Bul ekonomikanyń qýatyn arttyryp, sapaly jumys oryndaryn qurýǵa múmkindik beredi", - dedi Oljas Bektenov.
