London ICE birjasynda Brent markaly munaidyń tamyz aiyndaǵy fiýchersteriniń Astana ýaqyty boiynsha 08:50-degi jaǵdai boiynsha bir barreliniń baǵasy 9,79 paiyzǵa kúrt tómendep, 69,47 dollar boldy. Al WTI markaly tamyzdaǵy munai fiýchersteriniń bir barreli 9,72 paiyzǵa tómendep, 66,66 dollarǵa deiin quldilady. Kúni keshe 80 dollardy iektegen "qara altyn" baǵasynyń bulai tómenge ketýine ne túrtki. Muny Dalanews.kz saitynan oqyp-bile otyryńyzdar.
Negizinen, Brent markaly munaidyń baǵasy 60 dollar deńgeiden 78 dollarǵa deiin kóterilýine Taiaý Shyǵystaǵy ahýal túrtki. 13 maýsymda Iran men Izrail arasyndaǵy kezek-kezek atys-shabys "qara altyn" baǵasyn 70 dollarǵa deiin súirep ákeldi. Shielenis ýshyǵa túsip, Iran Ormýz buzatyn jabatynyn aityp qalai qopańdai bastady, baǵa taǵy da kóterildi. Al 22 maýsymdaǵy AQSh-tyń atalǵan óńirdegi qaqtyǵysqa tikelei aralasýy jáne Iran parlamentiniń arqyry Ormýz buǵazyn jabý týraly sheshim qabyldaýy "sońǵy tamshy" bolyp, baǵa eń joǵary shegin igerdi.
Al búgingi baǵanyń quldyraýyna Irannyń jaýapty soqqysy bastaý boldy. Iran Qatardaǵy jáne Iraktaǵy AQSh-tyń áskeri bazalaryn zymyranmen atqylady. Odan keiingi AQSh prezidenti Donald Tramptyń eki málimdemesi de "otqa mai quiyp berdi". Aldymen ol Iranmen aradaǵy Ormýz buǵazyn jabý yqtimaldylyǵy týraly qaýesetke bailanysty munai óndirýshilerdi baǵany ósirmei, tejep ustaýǵa shaqyrdy.
"Men bárin qadaǵalap otyrmyn! Olai jasasyńyzdar, jaýdyń degeni bolǵany. Bulai jasamańyzdar", - dep jazdy Tramp keshe keshkisin Truth Social-daǵy paraqshasynda munai óndirýshilerge qarata.
Sóitken ol óz energetika ministrligin kerisinshe, shuǵyl áreket etýge shaqyrdy:
"Burǵyla, balaqai, burǵyla! Bul arada aitaiyn degenim, jyldam kirisińder", - dedi Donald Tramp.
Taǵy kóp uzamai AQSh prezidenti Iran men Izrail arasynda atys toqtatylatynyn, sondai kelisimge qol jetkizilgenin habarlap, barshadan súiinshi surady.
"Barlyqtaryńyzdy quttyqtaimyn! Izrail men Iran arasynda atysty toqtatý týraly tolyqtai kelisimge qol jetkizildi (shamamen 6 saǵattan keiin, eki taraptyń sońǵy operatsiialary aiaqtalǵannan keiin) 12 saǵat saǵattan keiin soǵys aiaqtaldy dep sanalady!", dep jazdy ol jelide.
Onyń aitýynsha, resmi túrde atysty Iran doǵarady, al 12 saǵattan keiin oǵan Izrail qosylady.
"24 saǵattan keiin 12 kúndik soǵystyń resmi aiaqtalýyn búkil álem atap ótedi. Atysty toqtatýdyń ár fazasynda ekinshi tarap beibitshilik pen syilastyqty saqtaýǵa mindet alady. Bári oidaǵydai ótedi dep oilaimyn (jáne solai bolady da)", - dep atap ótti Tramp.
Ol Izrail men Iranǵa arasyndaǵy qaqtyǵysty "12 kúndik soǵys" dep ataýǵa bolatyn aityp, qos tarapty shydamdylyq, batyldyq tanytýlarymen jáne aqylǵa kelýlerimen quttyqtady.
"Munyń búkil Taiaý Shyǵysty qirandyǵa ainaldyratyn uzaq jyldarǵy soǵysqa ulasýy múmkin edi. Biraq olai bolmady jáne onyń beti aryn qylsyn!"- dedi Aq úidiń basshysy.
Biraq, ázirge qos tarap atqylasýyn áli jalǵastyryp jatyr. Túnde úsh memleket aspanyn jabýǵa májbúr boldy. Al tańerteń Qatar kógin ashyp, jan-jaqtan ushaqtardy qabyldai bastady.
