«Keńes» múgedekter qoǵamdyq birlestiginiń negizin qalaýshy, damýynda qiyndyqtary bar balalardy keshendi súiemeldeý modeliniń avtory Maira Súleeva Túrkistan qalasyna arnaiy is-saparmen keldi, – dep habarlaidy Dalanews.kz Túrkistan oblysy ákiminiń baspasóz qyzmetine silteme jasap.
«№6 arnaýly áleýmettik qyzmetter kórsetý ortalyǵy» KMM-niń jumys barysymen tanysqan Maira Súleeva ujym múshelerine múmkindigi shekteýli azamattardyń igiligi úshin qyzmet etýine tilektestik bildirdi.
Sanaly ǵumyryn múgedektigi bar azamattardyń saýyǵýy men qolaily jaǵdai jasaýǵa arnaǵan bilikti maman qyzmet kórsetýde jańa nysannyń múmkindigi joǵary ekendigin atap ótti. Oblystyq jumyspen qamtýdy úilestirý jáne áleýmettik baǵdarlamalar basqarmasynyń basshysy Ásiia Temirbaeva ońaltý ortalyǵy qazan aiynyń sońynda paidalanýǵa beriletindigin aitty.
– Ońaltý ortalyǵy 18 jastan asqan múgedektigi bar adamdarǵa jartylai statsionarlyq jaǵdaida qyzmet kórsetedi. Bizdiń mindet – múmkindigi shekteýli azamattarǵa qyzmet kórsetý. Saýyqtyrý ortalyǵynda meditsinalyq, pedagogikalyq eńbekke baýlý baǵyttarynda bir mezette 200 azamatqa qyzmet kórsetiletin bolady. Ǵimaratty tolyqqandy materialdyq-tehnikalyq bazamen jabdyqtalý boiynsha jumystar atqarylýda, – dedi Ásiia Quralqyzy.
Ortalyqtyń qurylys jumystary 2024 jyldyń sońyna deiin aiaqtalyp, 2025 jyldyń I toqsanynda paidalanýǵa beriledi dep kútilýde. Jańa ortalyq ǵimaratyna Tólebi aýdany, Tasaryq aýylynda ornalasqan tirek-qimyl apparaty buzylǵan balalarǵa arnaýly áleýmettik qyzmetter kórsetetin «№ 4 Tasaryq arnaýly áleýmettik qyzmetter kórsetý ortalyǵy» KMM-ni ornalastyrý (kóshirý) josparlanýda.
