Qazaqstanda pedagogterdi baǵalaý júiesi tolyq qaita qaralyp jatyr. Oqý-aǵartý ministrligi muǵalimderdi burynǵydai esep pen formaldy kórsetkishter arqyly emes, naqty nátije boiynsha baǵalaýǵa kóshpek, dep habarlaidy Dala News.
Bul týraly Ortalyq kommýnikatsiialar qyzmetinde ótken brifingte vitse-ministr Shynar Aqparova málimdedi.
Jańa model pilottyq rejimde engizilýde jáne ol bilim berý júiesindegi eń daýly ári uzaq jyldar boiy synalyp kelgen máselelerdiń birin ózgertýdi kózdeidi. Iaǵni, muǵalim jumysynyń tiimdiligi endi qaǵazbastylyqpen emes, oqýshyǵa áserimen ólshenedi.
«Pedagog-moderator sanaty úshin ashyq sabaqtar sany edáýir qysqartylady: buryn jyl saiyn 5 sabaq ótkizý kózdelse, endi attestattaý kezeńi ishinde barlyǵy 4 ashyq sabaq ótkizý jetkilikti bolady. Biliktilikti arttyrý kýrstarynyń kólemi 72 saǵattan 36 saǵatqa deiin qysqartylady. Pedagogtiń bilim berý uiymy deńgeiinde shyǵarmashylyq toptaryna, jobalarǵa qatysýy talap etiledi. Bilim berý uiymynda synyp saǵattaryn nemese synyptan tys is-sharalardy ótkizý talaby engiziledi», – dedi vitse-ministr.
Ministrlik bul ózgerister tek bir sanatpen shektelmeitinin atap ótti. Pedagog-sarapshy, pedagog-zertteýshi jáne pedagog-sheber deńgeilerine de uqsas talaptar qaita qaralyp jatyr.
Basty ózgeristiń biri – attestattaý júiesiniń tolyq tsifrlandyrylýy. Barlyq protsess «Ustaz» platformasy arqyly júrgiziledi. Onda muǵalimniń eńbek ótili, kásibi jetistikteri, sertifikattary men portfoliosy avtomatty túrde qalyptasady. Bul qujat ainalymyn qysqartyp, muǵalimderdiń ýaqytyn esep berýge emes, oqytý protsesine baǵyttaýǵa múmkindik beredi.
Vitse-ministrdiń aitýynsha, jańa júie tek qarjylyq yntalandyrý quraly emes.
«Attestattaý tek qosymsha qarjylyq yntalandyrý quraly emes, eń aldymen pedagog qyzmetiniń sapasyn ádil baǵalaý tetigi retinde qarastyrylyp otyr. Sonymen birge attestattaý pedagogtiń negizgi qyzmetine kedergi keltirmei, ony qoldaityn júie retinde qalyptastyrylady, iaǵni pedagogtiń ýaqyty artyq eseptilikke emes, oqýshymen jumysqa baǵyttalýy qamtamasyz etiledi», – dedi Aqparova.
Bul bastama sońǵy jyldary bilim salasynda júrgizilip jatqan jalpy reformalardyń jalǵasy. Buǵan deiin de ministrlik muǵalimderdiń júktemesin azaitý, qaǵazbastylyqty qysqartý jáne kásibi damýdy kúsheitý baǵytynda birqatar ózgeris engizgenin málimdegen. 
Sonymen qatar jańa talaptar pedagog mamandyǵyna túsý kezeńinen bastap kúsheitilip jatyr. Endi pedagogikalyq mamandyqtarǵa qabyldaý úshin shekti ball 75-ke deiin kóterilgen. Buǵan qosa, tek testke táýeldilik azaiyp, arnaiy emtihandardy qamtityn aralas baǵalaý júiesi engizilmek.
Ministrlik muǵalim mártebesin arttyrý baǵytynda áleýmettik qoldaý sharalary da jalǵasyp jatqanyn aitady. Sońǵy jyldary mektep muǵalimderiniń jalaqysy eki esege ósken, al mektepke deiingi uiym pedagogteriniń tabysy 30 paiyzǵa artqan. Demalys uzaqtyǵy 56 kúnge deiin kóbeigen. Osy ózgeristerdiń nátijesinde pedagogterdiń 95 paiyzy óz mamandyǵyna qanaǵattanatynyn bildirgen.
Jalpy, usynylyp otyrǵan jańa model bilim júiesinde paradigmalyq ózgeris retinde baǵalanýda. Eger buryn muǵalimniń jumysy esep pen formaldy talaptarǵa táýeldi bolsa, endi negizgi nazar naqty nátijege, oqýshynyń damýyna jáne bilim sapasyna aýdarylady.
Alaida sarapshylar bul reformanyń qalai iske asatyny sheshýshi faktor bolatynyn atap ótedi. Sebebi talaptardy jeńildetý men baǵalaý tásilin ózgertý – bir bólek, al ony ádil jáne tiimdi júzege asyrý – múlde basqa másele.
